Mieres pieslla’l serviciu de normalizacion

L´Asociación de Trabayadores de la Normalización Llingüística emitió ayeri un comunicáu en que denuncia'l pieslle del Serviciu de Normalización del conceyu de Mieres, un casu que denuncia que "ye sangrante por demás" en cuantes que "yá l'añu pasáu tuvimos que denunciar la mesma situación y ver cómo l'alcalde salía respondiendo a la nuestra denuncia con ocurrencies nes que confundía la normalización llingüística cola promoción y de les que nunca más se volvió saber nada"

L'Asociación de profesionales esplica que "la xera de dignificación social del asturianu requier un trabayu seriu, continuáu, planificáu y que solo a mediu y llargu plazu pue dar frutu valorable, por eso ye necesaria la presencia d'un técnicu que se dedique a facer esi trabayu durante tol añu".

El Serviciu de Mieres escomencipió´l so llabor nel mes de payares del 2005 y tuvo abiertu hasta avientu del mesmu añu. Abrió otra vuelta a mediaos de mayu y zarró nel mes de payares del 2006. Na primavera del 2007 volvió de nuevo a abrise pa zarrase el martes 12 d'esti mes de setiembre, un funcionamientu que l'asociación califica de "intermitente" y que diz que "emparamenta por demás el desenvolvimientu normal de les campañes que'l serviciu tien pendientes y amuesa una falta total de compromisu d'un Conceyu tan importante y significativu como Mieres na recuperación seria y planificada de la llingua".

Los profesionales de la normalización denuncien que'l conceyu de Mieres recibe una subvención de la Conseyería pa tener el serviciu abiertu, atender al públicu y facer campañes de normalización llingüística, y que la situación que se da nesti conceyu "provoca agravios comparativos con otros conceyos que reciben una subvención asemeyada y tienen el serviciu funcionando durante tol añu".

L´Asociación de Trabayadores de la Normalización Llingüística écha-yos la culpa al conceyu de Mieres y a la mesma Conseyería por consentir esta situación y reclama "la necesidá de que la Conseyería estableza un sistema de rellación colos Conceyos que permita la continuidá de los servicios de normalización.

La firma d'un conveniu, la convocatoria de places fixes de plantiya, la concreción llegal d'una Rede de Normalización y el siguimientu necesariu del funcionamientu de los Servicios, yá que tán subvencionaos con partíes presupuestaries propies, toes estes son decisiones polítiques necesaries pa que'l llabor de normalización llingüística nun quede en xestos pa la galería o sea flor d'un día".