Mieres festexa la llegada de la estación nueva cola Folixa na Primavera

|
Presentación Folixa na Primavera 2017

Música, tradición y fiesta axúntense esta fin de selmana en Mieres cola Folixa na Primavera. La sidra va correr pela villa en trés xornaes na que destaquen les actuaciones musicales de Seu, Dixebra, Nuberu y los quebequinos Yves Lambert Trio.

La Folixa na Primavera va comenzar mañana, a les 18 hores, cola inauguración de la esposición ‘Gastronomía n’Asturies’ na Biblioteca, pa una hora depués dar el chupinazu d’aniciu de la fiesta nel Parque Xovellanos, epicentru de les actividaes. Laude Martínez va encargase de lleer el pregón nun actu presentáu por Anabel Santiago –que va actual al final del mesmu– y nel que tamién va entregase’l XVII Distintivu a la Investigación Folclórica Fini Suárez, qu’esti añu ye pa l’Asociación de Vecinos Por un Cenera Mejor, “pol trabayu colectivu na conservación, espardimientu y dignificación de la cultura asturiana, cola celebración añal del Mercáu Astur”.

A les 20.10 hores va celebrase un festival de tonada con Patricia Pariente, Celestino Rozada Tamés, José Antonio ‘Cantu la Vara’ y los gaiteros Moisés Martínez López, Iván Rionda Castro y Ramón García Sánchez, eventu que va presentar José Manuel García. Tres el mesmu, a les 21.15 hores, va actuar la Banda de Gaites Villa de Mieres y,  a les 23 hores, el grupu folk del oriente Seu, que presenta formación nueva na Folixa na Primavera, y Dixebra cola xira ‘Tour 87-17’ por motivu del so trentenu aniversariu.

4.000 llitros de sidra

La bébora nacional ye ún de los grandes protagonistes de la Folixa na Primavera y dende mañana a les 19.05 hores van repartise nel Parque Xovellanos 4.000 llitros de sidra procedente de siete llagares. El sábadu l’espiche de les pipes va ser a les 12.05 hores, momentu nel que van tocar los grupos folclóricos La Flor del Pomar (Nava) y Ruxidera.

De tarde, la sidra va empezar a repartise a les 18.45 hores, depués de los xuegos pa neños y neñes y los xuegos tradicionales, y del pasucais de los grupos de l’Associació Cultural Sant Miquel de Balansat (Eivissa) y L’Artusu, con final nel Parque Xovellanos, onde van actuar a les 18.50 hores. Mentes, a les 19 hores va principiar na plaza de la Casa Conceyu l’Amuesa de Bandes de Gaites, cola participación de Villa de Mieres, Ciudad de Oviedo, El Gumial (Morea) y Lembrazas da Terra de Gullarei (Galicia). Tres un pasacais, a les 21 hores, toes van interpretar les sos pieces nel Xovellanos.

Pela nueche, a les 23 hores, van comenzar los conciertos con Nuberu, que ta de vuelta coincidiendo col so cuarentenu aniversariu, pa depués dar pasu al tríu lideráu por Yves Lambert, músicu quebequín que formó parte hasta’l 2002 de La Bottine Souriante, formación bien conocida n’Asturies. A les 2.15 hores va interpretase la Danza d’Oñón, al igual que tolos años.

Concursu de fotografía y menú de la Folixa

La venta de la bolla de la Folixa na Primavera na carpa la fiesta, El Requexu, el Liceo y la Plaza, por parte de la Hermandad de Festejos San Bartolomé de Baíña, dende les 9 hores, va abrir el domingu l’actividá de la xornada cabera d’esta edición. Al meudía va principiar el repartu de sidra, pa depués dar pasu a l’actuación del grupu Prau Llerón y una amuesa de deporte tradicional asturianu a cargu de Seis Conceyos.

Otra manera, la novedá  d’esta edición ye l’entamu del concursu de fotografía FotoFolixa’17, en collaboración cola Agrupación Fotográfica Semeya, que tien como oxetivu buscar la semeya de la Folixa na Primavera. Los ganadores van llevar premios de 300, 200 y 100.

Mentes, a lo llargo de los trés díes de celebraciones en Mieres, dellos restoranes de la villa van ufrir el menú de la Folixa na Primavera. Ésti va tar formáu por sopa d’ablanes o menestra del tiempo, de primeru; bacaláu o cabritu, de segundu; y borrachinos o sorbete de sidra, de postre.

AdxuntuTamañu
Microsoft Office document icon Programa Folixa na Primavera 201733 KB
Contador Estadistiques