Mieres celebra la llegada de la primavera con trés díes de Folixa

Cinco mil llitros de sidra esperen a mierenses y visitantes pa celebrar la Folixa na Primavera. Per trés díes, la ciudá va acoyer una cantidá importante d’actividaes, ente les que destaquen los conciertos de Xera, Cerezal, Korrontzi y Ross Ainslie.

El grupu vascu de folk va encargase d’animar la nueche de güei con un conciertu nel Parque Xovellanos –epicentru de la Folixa– xunto con Xera –nel so formatu acústicu ‘Raíz’–, que va abrir a les 23 hores. Enantes, a les 19 hores, va dar entamu de manera oficial la Folixa na Primavera con un chupinazu y la llectura del pregón por parte de los televisivos Toño (Alberto Rodríguez) y Raikonen (Joaquín Pajarón). Darréu va entregase’l XIV Distintivu a la Investigación Folclórica ‘Fini Suárez’ a Fe Santoveña “pol llargu trabayu desarrolláu nel campu de la música, la etnografía y la cultura tradicionales asturianes”.

L’espiche de les pipes de sidra ta previsto pa les 20 hores, momentu nel que tamién va dar aniciu’l Festival de Tonada, dirixíu por Luis Ángel Fombella, cola participación de María José García, José María Martínez y José Manuel Robledo ‘Lolo’, que van tar acompañaos polos gaiteros Belén Arboleya y Jesús Noriega, y l’Ochote Asturias. Per otru lláu, el Grupu de Baille Les Ayalgues tien previstu un pasucais a les 18.30 hores y una actuación a les 21 hores, ésta última xunto cola Banda de Gaites Villa de Mieres.

Mañana l’actividá va principiar a les 11 hores cola venta de la bolla na carpa de la Folixa y l’actuación, media hora depués, del Grupu de Baille Ruxidera. La sidra va repartise dende’l meudía y les 19.05 hores, tando la tarde dedicada de manera principal a los xuegos tradicionales pa neños. Les actuaciones, a les 20 hores, de la Banda Gaites Mieres del Camín y los grupos folclóricos La Barbacana, Santala, L’Artusu y Ruxidera van sirvir pa caldiar l’ambiente enantes de los conciertos principales de la xornada. Éstos van dar aniciu a les 23 hores con Cerezal, pa depués, alredor de la 1, ceder el testigu al mozu escocés Ross Ainslie, músicu de referencia nel so país. Por último, a les 2.45 hores, va interpretase la danza d’Oñón.

La xornada cabera de la Folixa na Primavera va ser el domingu, que va abrir a les 11.30 hores, tres la venta de la bolla, el grupu folclóricu Práu Llerón –tamién va tar na plaza d’El Requexu a les 13 hores–. El repartu de sidra va tener llugar al meudía y a les 13.30 hores ta prevista l’actuación nel auditoriu del Parque Xovellanos de la Banda Música de Mieres del Camín.

Menú de la Folixa, en 14 restoranes

El tradicional menú de la Folixa de la Primavera, compuestu por sopa d'ablanes o menestra del tiempu, bacaláu o cabritu y borrachinos o sorbete de sidra, va poder disfrutase estos díes en 14 restoranes del conceyu. Otra actividá paralela a esta fiesta mierense ye la esposición bibliográfica ‘La manzana y la sidra n’Asturies’, abierta al públicu hasta’l 11 de mayu na Biblioteca Pública de Mieres.