Mieres aprobó la creación del so serviciu de normalización

La Comisión de Gobiernu del Ayuntamientu de Mieres aprobó ayeri la creación del serviciu de normalización llingüística del conceyu cola convocatoria de la contratación de la plaza de titular del mesmu.

La creación d'esti serviciu va materializase n'acabando los exercicios de selección pal mes de payares y va funcionar como mínimo los dos meses que-y van quedar al 2005, anque se cuenta con que la subvención específica de la Conseyería de Cultura lu caltenga nel 2006, y ello ye que por de pronto yá cuenta con una partid acutada de 30.000 euros pa echar a andar. En cualquier casu, la de Mieres va suponer un refuerzu más na rede de normalización nos conceyos, que yá cuenta coles oficines de Xixón, Cabu Peñes, Comarca de la Sidra, Siero, L.lena, Avilés, Llangréu y cangas del Narcea, más la de Samartín del Rei Aurelio, creada tamién de recién.