Miembros de La Tarrancha participen el sábadu en Villaviciosa nun conciertu solidariu

|

El Teatru Riera de Villaviciosa va ser sede esti sábadu d’un conciertu solidariu a favor de la ONG Medicus Mundi. Miembros de La Tarrancha y d’otres formaciones van participar nesta iniciativa de Bailosolo y Banda Nocturna.
 
El Conceyu de Villaviciosa collabora nesti conciertu que va principiar a les 21.30 hores y que tien como oxetivu recaudar fondos pa meyorar la situación socio-sanitaria de les muyeres en países como Burkina Faso, Mali o Nicaragua. “Los proyeutos de Medicus Mundi ufren una atención integral a les muyeres en salú y constrúyense sobre l’asistencia sanitaria, con énfasis especial na salú sexual y reproductiva, l’apoyu social a les muyeres víctimes de malos tratos, y actividaes de sensibilización y información”, señalen dende la organización del eventu.
 
Amás de músicos de La Tarrancha, van collaborar nel conciertu acústicu dellos componentes de los grupos El Diablo Dijo No, Flying Padres, Seventeen Days, Stock Company, El Sueco Johansson y Johnny Radiator. La entrada-donativu va tener un preciu de 5 euros y va poder adquirirse nel propiu teatru una hora enantes del conciertu. Otra manera, les persones que s’averen al Riera tamién van poder contemplar la esposición ‘Salud es nombre de mujer’ sobre la situación socio-sanitaria de les muyeres en países subdesarrollaos. Ésta va tar abierta al públicu tola tarde del sábadu. 

Contador Estadistiques