Mick Harvey, Nacho Álvarez, Pauline en la Playa y La Estrella de David nel 26 aniversariu de La Plaza

|
26 Aniversariu La PLaza

El bar La Plaza de Xixón celebra un nuevu aniversariu y failo con música en vivo y fiestes el vienres 7 y el sábadu 8.

Mick Harvey, Nacho Álvarez & el Quarteto Bendición, Pauline en la Playa y La Estrella de David componen el cartel del conciertos que podrán vese esta fin de selmana nel escenariu de la Sala Albéniz, con evidente voluntá de caltener esa llínea cuidao y comprometío cola bona música que siempres s'escuchó n'ún de los chigres de referencia na ciudá, con Nacho Álvarez al frente.

Tres los conciertos na sala Albéniz, la folixa va siguir n'el mesmu chigre La Plaza, organizador del 26º aniversariu al pie de Mestizo Producciones.

La Plaza, más de cinco llustros de música y diversión nes nueches de Xixón

La Plaza, el mesmu chigre qu'abrió la so puerta nel corazón de Cimavilla una fría tarde de payares del añu 1992, nel qu'atoparon abellugu un bon númberu de mozos con ganes de compartir discos y afayos musicales difíciles de consiguir, onde antes s'escuchaben les primeres maquetes grabaes en casetes, depués EPs, depués CDs de grupos como Penélope Trip, Australian Blonde, Cobertor Ray, Nosoträsh.

Anguaño cualquier que s'avera a La Plaza una nuecher puede atopar ente la vecería habitual con Nacho Vegas, Jorge Explosión, Fee Reega y tantos otros músicos de la ciudá que pasen per esti local qu'algama los 26 años d'edá con un bagaxe sonoru llibre y desenvueltu pa beneficiu de xente con espíritu musical críticu, distinguíu y abiertu.

Vienres 7 d'avientu; Mick Harvey y Nachu Álvarez & Quarteto Bendición

Güei vienres 7 d'avientu les celebracioes van cuntar cola participación del músicu australianu Mick Harvey (miembru orixinal de The Birthday Party o The Bad Seeds de Nick Cave), que va ufiertar un conciertu dedicáu a versionar cantares del llexendariu Serge Gainsbourg. Va abrir la nueche Nacho Álvarez & Quarteto Bendición coles meyores temes del so esperáu segundu álbum, “Retales de Vientos Enfurecidos”.

Sábadu 8 d'avientu; Pauline en la Playa y La Estrella de David

La velada del sábadu 8 d'avientu va tar protagonizada por bonos amigos de La Plaza, cola presencia de les hermanes Álvarez, Mar y Alicia, que van aprovechar la xuntanza pa festexar los 20 años de Pauline en la Playa, y con David Rodríguez, La Estrella de David, que va faer parada na xira del so flamante discu, “Consagración”.

 

Contador Estadistiques