Meyorando nel Tartiere

De primeres sorpresa y más duldes sobre l'equipu al ver que Michu nun taba nin nel bancu. Entamó'l partíu con un Uviéu bien puestu nel prau y creando peligru a balón paráu, N. García con dos cabezazos a saque falta tuvo cerca marcar. El primer gol llegó nel minutu 11cuando n'otru saque falta que provocara Rubén con una gran xugada , l'árbitru pitó penalti por unes clares manes dientro l'área. Jon Carrera fizo'l primer gol dempués de tener que repetir el llanzamientu.

Pero ensin tiempu pa celebraciones, dio-y al Durango por baxar por primer y única vegada'l pelotu al prau y dar más de dos pases siguíos, consiguiendo nuna bona combinación el 1-1 nun remate d'Izurza axustáu al palu. D'equí al final la primer metada l'Uviéu foi'l de munchos minutos d'esta temporada, con munches duldes, con fallos en defensa y nun sabiendo a que xugar. Apaecieron los nervios y solo s'animó la xente pa gritar escontra'l conseyu y aplaudir a la Peña Abbey Tavern qu'ayeri visitó Uviéu.

Rivas fizo cambios nel segundu tiempu y la meyoría foi bultable. L'entrenador azul dexó nel vestuariu a Toni y dio-y entrada a Jandro, Zamora baxó al centru la defensa y Lusarreta pasó a la banda, Jon Carrera tiró un poco p'atrás y Rubén cambió de banda pasando Nacho Rodríguez a ser el segundu delanteru. Bastaron 4 minutos pa que l'Uviéu tuviere premiu, N. Rodríguez fizo una bona xugada per banda centró raso al área y el rechace del porteru quedó-y a Jandro pa marcar a placer. Dempués d'esti gol, los dos equipos tuvieron un tiempu amagando pero ensin dar, disfrutando dambos equipos de delles ocasiones clares. La defensa siguió con fallos pero Ismael y J. Carrera crecieron nel centru'l campu y Rubén y Jandro crearon muncho peligru peles bandes. Foi la calidá de Rubén, el meyor del partíu, la que decidió nel minutu 30 con un xugadón dende la banda drecha rompiendo pal centru que remató con un gran pase pa que Cervero ficiera'l definitivu 3-1. Esti gol rompió'l partíu, Rivas metió a Paul pa mandar otra vuelta a Zamora al centru'l campu y esperar a que l'árbitru pitare'l final.

Trés importantes puntos que lleguen dempués de dos derrotes siguíes y tienen de rematase con una victoria en Lemona'l próximu sábadu a les cinco.