Mercedes Fernández ye reelixida presidenta del PP col apoyu del 96 por cientu de los compromisarios

La candidatura de Mercedes Fernández algamó un apoyu casi unánime nel decimosétimu congresu del Partido Popular (PP) asturianu al sumar 686 apoyos de los compromisarios, con 23 votos en blancu y 6 nulos. La reelixida presidenta de la formación tornó esti llunes a alcordase de la llingua asturiana.

Tres superar a Carmen Maniega nes primaries celebraes la fin de selmana pasada col 88 por cientu de los votos, Fernández foi nomada candidata única pa la presidencia nel congresu del sábadu, onde tornó a amosar el so liderazgu nel Partido Popular (PP) asturianu. La xixonesa algamó’l 95,94 por cientu de los votos y convocó “a tolos asturianos a recuperar la ilusión porque, col PP, se pueden facer les coses meyor".

Fernández confía en ganar les eleiciones nacionales del 2019 “porque veo la ilusión y el rellumu nos güeyos de toos vosotros, y porque se pueden facer otres coses n’Asturies”. “Hai que vencer y sacudinos el clima de desánimu qu’instaló’l socialismu y la izquierda, apostando pol entusiasmu y con más liderazgu”, siguió na so intervención, pa citar depués como oxetivos la creación d’emplegu y el desaniciu del impuestu de socesiones.

Difusión del bable

La reeleción de Fernández como presidenta del PP nun fai cambiar los sos discursos, asina como la so postura d’ataque al asturianu. Tres la xunta de voceros d’esta mañana nel Parllamentu, la popular anunció que nel Plenu d’esta selmana va denunciar la “negativa política socialista” sobre los museos, asina como “la falta de tresparencia y opacidá del Executivu de Javier Fernández sobre lo qu’ocurre na empresa pública del suelu, Sogepsa”.

No que respeuta a primer asuntu, afirmó que “hai munchu déficit de xestión nos museos d’Asturies, de poner nel escaparate español y internacional los bonos museos que tenemos”. Depués citar dalgunes de les munches faltes qu’atopa con respeuto a estos recintos, la popular llamentóse de que “paez que la conseyería ta más dedicada a la difusión del bable”.