Mercedes Fernández venceya la oficialidá cola traducción simultánea

La líder popular presidió la xunta llocal del PP de Llangréu, onde insistió na supuesta falta de demanda pa una declaración de cooficialidá y criticó con durez al PSOE.

Mercedes Fernández pidió a los miembros del PP "arremangu" pa esplicar de cara a les eleiciones qu'un gobierno socialista na Xunta Xeneral "nun sirve pa casi nada" más allá de promover la oficialidá del asturianu, una cuestión pa la que, n'opinión de la presidenta del partíu n'Asturies, nun hai una demanda mayoritaria nin ye una prioridá. "Negámos a una cooficialidá que nun tiene vuelta atrás y a establecer l'Asturies de la traducción simultánea", sorrayó al tiempu que ponía a Galicia, onde gobierna'l PP, como exemplu d'un territoriu prósperu que s'abre al mundu. Al respeuto, hai que recordar que precisamente Galicia ye una comunidá billingüe na que la llingua propia ye cooficial xunto al castellanu.

Na so intervención tamién afirmó que "el PSOE hipotecó'l futuru de les cuenques, engañó y tiró los millones de la reactivación" y reclamó a los socialistes que pidieren perdón. D'igual forma, fixo referencia al sindicalista José Ángel Fernández Villa, recientemente condendáu a 3 años de cárcel por apropiación indebida de fondos del so sindicatu SOMA-UXT, que "ponía y quitaba presidentes n'Asturies, anque agora parez que naide nun lu conocía".

Semeya obra de Carmen Rodríguez Maniega baxo llicencia CC BY-SA 3.0.