Mercedes Fernández diz que l'asturianu normativu "nun ye'l que falamos con normalidá"

Cree que la cooficialidá "alteraría profundamente la vida de los asturianos".

Mercedes Fernández, presidenta del Partido Popular (PP) d'Asturies, aprovechó'l Comité Executivu del partíu pa posicionase una vegada más contra la oficialidá. “El PP diz non, nidiamente, a la cooficialidá del asturianu, que respuende a intereses distintos a los de la rexón, porque lo qu'Asturies necesita ye creación d'emplegu, mozos que se queden na nuesa tierra o un modelo fiscal que rebaxe los altísimos impuestos que soporten los asturianos”, afirmó.

Tamién apuntó que pa la defensa del idioma hai una llei fecha pol so partíu na presidencia de Sergio Marqués –por iniciativa del Partíu Asturianista (PAS)–, “que sirvió pa garantizar qu'usemos l'asturianu con llibertá y normalidá, pero nos negamos a que l'Academia de la Llingua afite un asturianu de llaboratoriu, artificial, que nun ye'l que falamos los asturianos con naturalidá”. Amás alvirtió que de declarase la cooficialidá del asturianu y del gallego-asturiano "nun habría marcha atrás".