Mercedes Fernández anuncia que va apoyar al candidatu de Foro a la presidencia de la Xunta Xeneral

Foro de Ciudadanos va tener los votos del PP na sesión constitutiva de la Xunta Xeneral. Mercedes Fernández anunció que va apoyar al candidatu que proponga esti vienres el partíu de Francisco Álvarez-Cascos como presidente de la Cámara.
 
Fernández realizó estes manifestaciones na rueda prensa posterior al Comité Ejecutivo Regional del PP celebráu nel Auditoriu d'Uviéu que ratificó tamién por unanimidá la so candidatura a la presidencia del país, a la que tamién van concurrir los aspirantes de Foro y PSOE. La responsable máxima del PP d'Asturies reconoció una posible actitú "inocente" al facer públicu en tiempu real los resultaos de los socesivos contautos con Foro y col restu de fuercies polítiques y alvirtió, sobre manera a PSOE y IX, que "nun hai razón nenguna pal polveru", pues nes negociaciones "hai meyores, retrocesos y parones". Hai que destacar que l’anuncia de Fernández d’apoyar al candidatu de Foro na sesión de mañana llega tres la propuesta d’Álvarez-Cascos d’un Gobiernu presidíu por él mesmu, con cuatro de les nueve conseyeríes pal PP, y la presidencia de la Cámara pa los populares, lo que la dirixente popular refuga dafechu.
 
La candidata del PP tamién reconoció que güei recibió una llamada del diputáu electu d'UPyD na qu'ésti treslladó-y la propuesta d'una Mesa plural, encabezada pol PSOE como partíu más votáu, pero con presencia de los cinco grupos con representación parllamentaria. Asina, anunció qu'a lo llargo del día devolverá-y la llamada pa comunica-y el plantegamientu del PP al respeuto y dixo que va dexar abiertes les posibilidaes de diálogu hasta'l momentu de la votación, a les 12 hores de mañana.