Mensaxes estremaos na fiesta del 1 de mayu

La manifestación del 1 de mayu organizada poles centrales mayoritaries UXT y CCOO n'Avilés, axuntó, según les entidaes organizadores, a cerca de 15.000 persones baxo la demanda de "creación d'empleu estable y de calidád" y la esixencia de desarrollu del "plan industrial" p'Asturies. Los secretarios d'UXT Justo Rodríguez Braga, y CCOO, Antonio Pino, criticaron la iniciativa de la Federación Asturiana d'Empresarios de crear un sistema propiu de contratación que calificaron de "serviciu priváu d'empléu" y "quiebra del actual marcu social que supón el serviciu públicu d'empléu".

UXT centró'l mensaxe na necesidá del plan industrial centráu nel carbón, la regasificadora y les plantes de ciclu combináu xunto cola meyora de les polítiques sociales y de vivienda" mientres qu'Antonio Pino llamó l'atención sobre'l posible españíu de la burbuya inmobiliaria y sobre "lo feble del crecimientu económicu que namás se tien construcción" polo que pidió "un cambéu de modelu productivu" cuestionando la plítica de grandes obres públiques como'l Puertu del Musel, que calificó de "pan pa güei y fame pa mañana".



Pela so parte, los sindicatos CSI, CXT, SUATEA y Sindicatu Ferroviariu reclamaron ayeri'l cese del delegáu del Gobiernu, Antonio Trevín, nel pieslle a la manifestación del 1 de mayu de Xixón, na que participaron cerca de 2.000 persones. La denuncia del "clima de represión que sufren a los movimientos sociales y colectivos llaborales, de que les entidaes organizadores responsabilicen a Antonio Trevín, centraron la marcha

El casu de los sindicalistes Cándido González Carnero y Juan Manuel Martínez Morala, que s'enfrenten a una condena de trés años de presidiu poles protestes del sector naval y que tienen recurrida una segunda sentencia na que salieren absueltos tuvo un gran pesu na manifestación, denunciándose tamién los xuicios contra los dirixentes de Suatea Beatriz Quiros y Jesús de la Roza, los trabayadores de Caxastur o la multa a Txomin Goñi, presidente de l'agrupación de colectivos ACA y secretariu d'Amigos y Vecinos de Llanes, por asistir a un plenu municipal con una camiseta na que denunciaba la especulación urbanística.

La demanda d'una mayor estabilidá llaboral, la mengua de la siniestralidá llaboral, la denuncia de la práctica sistemática de la subcontrata y la critica a la reforma de la Seguridá Social pautada ente l'executivu y los sindicatos mayoritarios tamién foron otros de los argumentos de la manifestación, que tamién tuvo un güecu pa condenar "la especulación urbanística que cooirompe a políticos estropia la costa y el mediu ambiente y que supón un robu pa los pequeños propietarios espoliaos por Sogepsa".