Mensaxe de Javier Fernández pol Día d'Asturies

Intervención del presidente del país con motivu de la celebración del 8 de setiembre.

"Güei celebramos el Día d'Asturies, la xornada que nos convoca a toos, xuníos cola fuerza del amor a la nuestra tierra. Ye la nuestra fiesta, la fiesta que nesta ocasión celebramos en Taramundi, conceyu onde va trés décades empecipió, con un feliz impulsu, el despegue del turismu rural.

El primer saludu d'esti día tien, como tolos años, unos destinatarios prioritarios: quien, por una o otra causa, de la índole que seya, nun ven motivos pa la celebración. El Gobiernu d'Asturies ta obligáu moral y cívicamente a ponese del so llau, a pensar nos que sufren problemes personales, los que nun topen trabayu o se vieron forzaos a buscar otros destinos onde atopalu. A ellos y a tolos emigrantes, a esa Asturies esvalixada pel mundu, espreso-yos el sofitu y la solidaridá del mio Executivu.

Hai 30 años, n'efectu, diose un reblagu en Taramundi. De magar, la meyora turística del Principáu y, en concretu, del turismu rural foi indiscutible. El deber de les instituciones consiste precisamente en tomar la iniciativa pa resolver los problemes de la ciudadanía. Ésa ye la so razón de ser. La so existencia namás se xustifica na midida que seyan abordamos proyectos bien ambiciosos, como'l desarrollu del área metropolitana, y consiguimos que la negociación y el diálogu fructificaren nun bon alcuerdu de concertación y un pactu pioneru n'España contra la violencia de xéneru. L'amenorgamientu sosteníu del desemplegu y la meyora de los datos económicos refuercen amás el convencimientu de que la comunidá nuestra llogró sumase a la recuperación.

Ésa, repito, ye la razón de ser d'esti Gobiernu, de tou gobiernu: trabayar pa los sos ciudadanos. Prometo que'l Gobiernu d'Asturies perseverará nesi camín, porque nun existe otru más beneficiosu. Vamos insistir nel diálogu, cola mano tendida a tolos que de verdá tean comprometíos col sofitu a los más necesitaos, el bienestar social, la solidaridá y el desarrollu económicu d'esta tierra. Les oportunidaes desperdiciaes nel pasáu han valir pa facenos recapacitar. Los homes y muyeres d'Asturies nun merecen cargar coles consecuencies de la cerrazón y de les miseries de los cálculos particulares. Ésti ye, esplícitamente, un mensaxe pal entendimientu pol progresu del Principáu al que naide nun tendría de sentise ayenu.

Tampoco nun declaramos estraños a la situación nacional. Sufrimos una llarga etapa d'incertidume política ya institucional inédita na historia de la democracia. Asocede amás cuando les demandes independentistes algamaron una fortaleza que nun cabe ignorar. Facer un llamamientu pa evitar qu'esta situación s’enllargue dexenere nuna fartura d’aburrimientu ciudadanu contra la irresponsabilidá de los sos representantes forma parte tamién de les preocupaciones del Gobiernu nesta xornada.

Concluyo con una sincera invitación a celebrar el Día d'Asturies. Sobren motivos pa sentinos arguyosos de la nuestra tierra. Nun fai falta que vos esponga y sería, amás, un resume imposible, un catálogu perampliu qu’entamaría dende la so guapura natural y la so brava hestoria hasta la fortaleza de los sos servicios públicos. Los que güei tán fuera d'Asturies van ser, probablemente, los que con mayor intensidá van vivir esti sentimientu. Con ellos, con tolos homes y muyeres de la nuesa comunidá, feliz Día d'Asturies. Munches gracies".

La intervención orixinal foi en castellanu. / Semeya obra d'Armando Álvarez.