Mediu Rural quier que pal 2012 el 6,5 por cientu de les necesidaes enerxétiques se cubran con biomasa

La Conseyería de Mediu Rural y l'Indurot presentaron esti martes la Estratexa d’Aprovechamientu Sostenible de la Biomasa Forestal d’Asturies. Ésta pretende que pal 2012 el 6,5 por cientu de les necesidaes enerxétiques se cubran con biomasa.
 
El periodu de implementación de les midides d’esta Estratexa, que foi presentada esta mañana por Aurelio Martín, conseyeru de Mediu Rural y Pesca; Joaquín Arce, direutor xeneral de Política Forestal; y Miguel Ángel Álvarez, direutor del Institutu de Recursos Naturales y Ordenación del Territoriu de la Universidá d’Uviéu (Indurot), estiéndese dende 2011 hasta 2020, señalándose 2015 como horizonte intermediu d’evaluación de los progresos algamaos y revisión de les propuestes. L’oxetivu a plazu curtiu ye llegar cubrir esi 6,5 por cientu de les necesidaes enerxétiques asturianes pa l’añu qu’entra mediante fontes d’enerxía basaes na biomasa. Estes midides organícense en cuatro llinies: adecuación normativa y meyores alministratives; planificación, ordenación y xestión forestal; apoyu direutu a la promoción y consumu; formación, divulgación e investigación.
 
Hai que destacar que n’Asturies hai agora dos proyeutos industriales de producción de biomasa térmica –Pellets Asturias, en Tinéu, y Agroforestal Nava–, que reciben una sovención de 2,2 millones d’euros, y tán en marcha tres proyeutos pilotu pal so desarrollu nos montes del país. Éstos son el parque d’estielles de Serán, en Pezós; el parque d’estielles del monte L’Enguilu, en Nava; y los montes d’Ibias. Los tres proyeutos cuenten con un presupuestu total de 210.000 euros y pretenden demostrar cómo se pue aprovechar el potencial enerxéticu d’estes viesques.