Mediu Rural propón una midía de fiscalidá verde

El conseyeru de Mediu Rural y Pesca del Gobiernu asturianu, Aurelio Martín, presentó esti llunes la propuesta d'un nuevu impuestu autonómicu que gravaría la ocupación de montes p'actividaes non sostenibles.

Con él se prevé recaudar ente 14 y 18 millones d'euros. D'esta manera, quedaría como'l segundu impuestu propiu en recaudación tres el Canon de Saniamientu d'Agües.
  
Sicasí, coles previsiones d'instalación d'aeroxeneradores y de nueves llinies d'alta tensión o ampliación de les existentes, la recaudación total podría quedar a mediu plazu nunos 20 millones d'euros.
  
Martín espera qu'esti impuestu ambiental se tramite dientro de la Llei d'Acompañamientu de los Presupuestos y tea vixente a partir del 1 de xineru del 2011. Pa ello, el conseyeru espera que la iniciativa d'IU-Verdes cuente col apoyu de la parte socialista del Gobiernu, y recuerda que n'otres comunidaes autónomes dirixíes pol PSOE existen impuestos asemeyaos.
  
Aurelio Martín, que tuvo acompañáu na rueda prensa pol director xeneral de Montes, Joaquín Arce, esplicó que quedarán escluyíes d'esti impuestu les actividaes "sostenibles" tales como l'agricultura, la ganadería o la industria maderera.
 
"Ye'l momentu de pasar de la poesía a los fechos no que se refier a la fiscalidá verde", argumentó martín. Asina, l'oxetivu d'esti impuestu, que según el conseyeru sigue la llinia de les polítiques medioambientales más avanzaes d'otros países europeos, ye gravar a les empreses que desarrollen actividaes "non sostenibles" polos daños, incidencia, alteración o riesgu de deterioru nos montes, y asina posibilitar la preservación de los montes asturianos y la protección del patrimoniu natural. 
  
El nuevu impuestu valdría tamién pa inyectar recursos nestes polítiques medioameintales na actual situación de crisis económica. Del mesmu mou, el conseyeru caltién que contribuiría a xenerar empléu nel ámbitu de la conservación forestal y poro, permitirá fixar población nel mediu rural.
  
Usos gravaos
Los usos gravaos diben ser les infraestructures de tresporte y producción eléctrica; la producción minera y otres actividaes estractives; el tresporte de persones en teleféricu, funicular o telesilla; los remontes mecánicos pa tresporte de mercancíes; gaseoductos y oleoductos; asina como otres actividaes vincuales, amás de pistes, carreteres y caminos d'accesu.
  
Pa la so aplicación, cuéntense tolos montes incluyíos na Llei de Montes y Ordenación Forestal d'Asturies, tanto los de titularidá pública como privada. Si bien, l'impuestu nun lu van pagar los propietarios del monte, sinón los que desarrollen nél una actividá. Nun afectará a les entidaes públiques nin a los conceyos.    
  
Sobre la posibilidá de que les compañíes repercutan nos usuarios o consumidores esti nuevu impuestu, el conseyeru afirmó que ye "imprevisible" qu'haya una alteración de tarifes pa un territoriu o CC.AA concreta, y indicó que'l proyectu ta avaláu por un estudiu de la Universidá d'Uviéu.