Mediu millar de persones participaron na manifestación de Xixón pol Día de la Nación Asturiana

|

Alredor de mediu millar de persones salieron a la cai nel Día de la Nación Asturiana pa reclamar “soberanía” y un “cambiu social”. Compromisu por Asturies, Conceyu Abiertu, Andecha Astur y Izquierda Anticapitalista convocaron esta marcha.

El día soleyeru col qu’amaneció Xixón ayudó a dar vistosidá a una manifestación bañada n’azul y mariellu pola cantidá grande de banderes asturiaes que llevaron les persones participantes na marcha, convocada baxo’l lema ‘Asturies decide: pola soberanía y el cambiu social’. Ésta salió con dalgo más d’un cuartu d’hora de retrasu de la Plazuela San Miguel, pa depués percorrer Menéndez Valdés y xirar n’El Parchís per San Bernardo hasta la Plaza Mayor. Ehí, garraría direición hasta Cabrales, pa finar n’El Naútico.

Una banderona abrió la manifestación, a la que siguió una pancarta que rezaba ‘Asturies decide’, tres la que diben representantes de les cuatro formaciones d’izquierda convocantes. Tamién llevaron baberu propiu la Xunta Estudiantil Asturiana (‘Pola educación pública asturiana. Igualitaria, popular, emancipadora y de calidá. ¡Soberanía educativa p’Asturies!), Andecha Astur (‘Pola soberanía y l’autodetermín d’Asturies’) y la Corriente Sindical d’Izquierda (‘¡Tán fundiendo Asturies! Hai futuru: resistencia y llucha obrera’), mentes que Darréu dexóse notar con una pancarta col lema ‘Soberanía, la llave’l nuesu futuru’. Otros coleutivos que sofitaron la marcha, que finó cola llectura d’un comunicáu conxuntu por parte d’Antón Caamaño, foron el Centru Social Autoxestionáu La Semiente y el Sindicatu Unitariu y Autónomu de Trabayadores de la Enseñanza d’Asturies (SUATEA).

 

Contador Estadistiques