Mediu centenar de cicloturistes xubieron al Gamoniteiru

Mediu centenar de cicloturistes dieron cita en La Pola L.lena pa participar en Marcha Cicloturista Puerta d'Asturies “Xubida al Gamoniteiru” qu'entamó'l Club Ciclista Puerta d'Asturies.

Cicloturistes de Madrid, Galicia, País Vascu, Castiella Lleón y de munchos clubes asturianos esfrutaron d'un día perafayadizu pa la práctica d'esti deporte, nes carreteres del conceyu de L.lena.

A les nueve de la mañana dábase la salida a los participantes nel polideportivu de la capital l.leniza, pa percorrer los 65 km. que tenía la prueba. Tres un pasu pola población de Campumanes, empobinaron pa la primer dificultá montascosa del día, l'Altu del Cordal, qu’encadenaron col Altu de Cuchu Puercu y tres d’un rápidu descensu pela Cobertoria llegaron al primera avituallamiento de la xornada que taba asitiáu na Plaza de La Pola L.lena.

Dempués de reponer fuerces entamaron camín escontra'l puntu cimeru del día, l'altu del Gamoniteiru, la cota más alta de la Sierra del Aramo a 1.788  metros d'altitú al qu’aportaben en pequeños grupos. Dende esi altu, los deportistes pudieron esfrutar d'unes maraviyoses vistes de la zona central del país.

La marcha remató en La Pola L.lena, onde los organizadores apurrieron regalos a tolos participantes.