Mediu Ambiente pide información de los materiales usaos n’El Musel

|

Ecoloxistes n'Aición d'Asturies señaló que'l Ministeriu de Mediu Ambiente y Mediu Rural y Marín solicitó a l'Autoridá Portuaria de Xixón un informe sobre'l supuestu usu de materiales sin contemplar na Declaración d'Impactu Ambiental.

El pidimientu respuende a la denuncia d'esti colectivu ecoloxista con respecto al usu de material procedente de Mina La Camocha pa utilizar como rellenu nes obres d'ampliación portuaria.
  
Ecoloxistes n'Aición d'Asturies recordó tamién que nel documentu de Memoria Resumen, sobre'l proyectu de dragáu nes zones I y II de les agües del puertu de Xixón pa la obra d'ampliación del puertu (xunetu del 2005), apaecen, dientro de les posibles alternatives, y como opción 'c', les Escombreres de la Mina de la Camocha, anque se refugó.
  
Nesti sen, falábase d'un millón de metros cúbicos aprovechables como rellenu a tresportar vía camión, travesando barrios bastante poblaos, lo que podría orixinar afecciones non deseables por accidentes, ruiu, vibraciones, emisión de polvu y interferencies col tráficu.
  
Por esti motivu, tres l'analís d'alternatives plantegaes pal llogru de material pal rellenu, entendióse que lo más favorable yera'l dragáu, a pesar de lo que, "nestos momentos tán utilizándose los materiales de la mentada escombrera", critica'l colectivu ecoloxista.
  
Coles mesmes, señala qu'anque-y correspuende'l siguimientu y vixilancia del cumplimientu de la declaración d'impactu ambiental a l'Autoridá Portuaria de Xixón, al ser ésta l'Autoridá Sustantiva con base al Real Decretu Lexislativu 1/2008, de 11 de xineru, nun evita que'l Ministeriu puea algamar información y efectuar les comprobaciones necesaries pa verificar el cumplimientu del condicionáu de la Declaración d'Impactu Ambiental (DIA).
  
Pela so parte, l'Autoridá Portuaria de Xixón evitó confirmar a Europa Press si recibió yá'l pidimientu del Ministeriu de Mediu Ambiente y tampoco quiso falar sobre l'usu de material de la escombrera de Mina La Camocha.
 

Contador Estadistiques