Mediu Ambiente empieza los contactos colos conceyos del área central pa coordinar midíes anticontaminación

Van ponese en marcha actuaciones preventives en 16 conceyos p’aplicar n’episodios onde aumente la concentración de partícules.

La Conseyería d’Infraestructures, Ordenación del Territoriu y Mediu Ambiente empezó güei los contactos con seis de los dieciséis conceyos de la zona central d’Asturies, potencialmente afectaos por concentraciones elevaes de partícules en suspensión en situaciones d’inversión térmica o estabilidá meteorolóxica.

El directores xenerales de Prevención y Control Ambiental, Elena Marañón, y de Calidá Ambiental, Manuel Gutiérrez, reuniéronse na Federación Asturiana de Conceyos (FACC) con responsables de los gobiernos locales d’Uviéu, Siero, Llanera, Noreña, Morcín y La Ribera, amás de con responsables de la Delegación de Gobiernu d’Asturies, la Xefatura Provincial de Tráficu y l’Axencia Estatal de Meteoroloxía.

L’oxetivu ye diseñar y coordinar les midíes que les partes implicaes podríen poner en marcha pa garantizar la calidá del aire y evitar que les concentraciones xuban percima de lo permitío. Trátase d’actuaciones preventives y de meyora rellacionaes col mediu ambiente urbanu en 16 conceyos potencialmente afectaos poles emisiones asociaes al tráficu, la industria o’l sector residencial.

Les xuntes de trabayu van siguir nes selmanes vinientes colos conceyos restantes, Xixón, Avilés, Gozón, Corvera, Castrillón, Carreño, Mieres, Llangréu, Samartín del Rei Aurelio y L.lena, y l’oxetivu ye cuntar con un documentu de protocolu esta primavera.