Mediu Ambiente diz que Caliao ye "d'interés estatal"

La ministra de Mediu Ambiente, Cristina Narbona, negó ayeri en Madrid qu'exista confrontación ente'l Gobiernu central y l'asturianu respective a la construcción del embalse de Caliao, y garantizó que'l so Ministeriu tien asumida la construcción d'esta infraestructura como una obra "d'interés estatal" en casu de que los estudios qu'hai entamaos "demuestren que nun hai alternatives meyores dende'l puntu de vista económicu y ambiental".

Narbona fizo estes declaraciones ayeri en Madrid, según informó'l Principaú al traviés d'una nota de prensa, tres d'un conceyu cola Conseyera de mediu Ambiente y Desarrollu Rural del Principáu d'Asturies, Belén Fernández, y la diputada socialista y portavoz de Mediu Ambiente y Mediu Rural, Elena Díaz Palacios. Nel alcuentru priváu, la Ministra intercambió opiniones coles responsables polítiques asturianes sobre dellos temes d'actualidá, ente ellos la política del agua y la propuesta de resolución aprobada colos votos de PP y IX nel Debate d'Orientación Política de la selmana pasada. PP y IX consideren la cosntrucción del embalse un proyectu "obsoletu y innecesariau".

Narbona defendió, nesti sen, "la coincidencia de criterios ente les alministraciones estatal y autonómica".

"Quixera aportar claridá al alderique sobre l'embalse de Caliao, que nestos últimos tiempos ta derivando nuna supuesta confrontación ente'l Ministeriu de Mediu Ambiente y el Principáu d'Asturies, confrontación que nun existe", esplicó la Ministra. Narbona recordó, nel conceyu colos responsables del Principau que "nestos momentos, tán entamando los trabayos que van permitir facer la tramitación ambiental del embalse de Caliao y nestos trabayos previos tán analizánose toles alternatives posibles y también les meyores estimaciones posibles en cuantes a la demanda d'agua a satisfacer".