Mediu Ambiente declara viables siete tramos de la llinia d’alta tensión Soto-Penagos

El Ministeriu de Mediu Ambiente asoleyó ayeri en BOE la declaración d'impactu ambiental favorable pa siete tramos de la llinia d'alta tensión de 400 kv que la empresa Rede Eléctrica Española quier tirar ente'l conceyu asturianu de La Ribera y Penagos, en Cantabria. Ello supón un pasu alantre na construcción d'una de les "autopistes eléctriques" del norte y que defenden a comuña alministración asturiana y les empreses del sector eléctricu. Concebida yá nel añu 1989, la llinia qu'atraviesa tol oriente asturianu foi una de les que más rocea criaron ente'l movimientu ecoloxista y munchos conceyos de les dos autonomíes.

La sentencia más dura a la escontra de la construcción de la llinia diola'l Tribunal Supremu nel añu 2002, cuando-y retiró al trazáu orixinal que se proponía la consideración de "utilidá pública". Agora, la declaración de Mediu Ambiente supón que se declaren ambientalmente vidables siete tramos de la llinia, de los que cinco pasen perAsturies. Trátase del tramu Uviéu Siero, de 13,4 km y qu'afecta a los conceyos d'Uviéu, La Ribera, Llangréu, Noreña y Siero; la variante de Nava, de 4 km, ente Nava y Cabranes; la variante de Cangues d'Onís-Onís de 21,6 km y qu'afecta a Parres, Cangues d'Onís y Onís; y les variantes de les Peñamelleres, que suponen otros diez kilómetros y que lleven la llinia a la llende con Cantabria.

Anque dende instancies oficiales s'afirma que la declaración de Mediu Ambiente supón la retirada de toles torgues que bloquiaben la construcción de la llinia, dende Izquierda Asturiana (IAS) formación que tien denunciada la infraestructura énte dos organismos de la UE, aseguren qu'ello nun ye asina y que la declaración de Mediu Ambiente ta emplegándose dende sectores interesaos na llinia como una "cortina de fumu pa tapar la realidá" que nun ye otra que la llinia entovía ta bloquiada por procesos contenciosos y investigaciones en dellos de los sos tramos.

La organización asturianista manifiesta que'l que REE tramitare correctamente delles variantes de trazáu "de nenguna manera llegaliza lo que yá ta construyío", alegando que "ta demostrao, tanto pa los tribunales españoles como pa los europeos que'l trazáu orixinal ye illegal". IAS afirma que "la pretensión de l'alministración y REE de facer estudios d'impactu ambiental sólo en dellos tramos ye una burlla pa los tribunales de xusticia españoles y de la CE, y pa los mesmos afectaos". IAS asegura que la Comisión Europea yá-y abrió nel so día procedimientu d'infracción al Estáu español pola tresposición enquivocada de la directiva relativa a la evaluación d'impactu ambiental, polo que ta investigando l'asuntu a instancies de la formación nacionalista. IAS recuerda la esistencia de les dos sentencies del Tribunal Supremu del añu 2002 que faen nulos los alcuerdos del Conseyu de Ministros que declaraben la utilidá pública del trazáu orixinal , que cree que tendría por ello de sometese a evaluación d'impactu, ello xunta otra sentencia del Tribunal de Xusticia de les Comunidaes Europees nesti mesmu sentíu.


Izquierda Asturiana (IAS) denuncia "que'l comportamientu de REE mándase pol engañu permanente, la ocultación de datos y la política de fechos consumaos con la complicidá y el silenciu de delles alministraciones"". IAS afirma qu'esiste una sentencia adicional del Tribunal Superior de 20 de setiembre del 2004 que declara la nulidá de dellos tramos en Cantabria y qu'ordena retrotraer les actuaciones al momentu en que debió facese l'informe d'evaluación d'impactu ambiental". IAS asegura que Rede Eléctrica y l'Alministración "guardaron en caxón cerca de dos años esta sentencia y llevaron alantre la llinia, qu'agora ta funcionando de forma illegal". Ias tien mieu de que n'Asturies pueda dase una situación asemeyada "onde cola supuesta llegalidá de dellos tramos, intentaríase colar la mayor parte del trazáu orixinal" IAS afirma que les declaraciones de los alcaldes de Siero, Nava y Piloña anunciando negociaciones con REE pa tramitar nueves variantes de la llinia son "una estafa y la preba de que la empresa reconoz qu'hai illegalidaes". La formación nacionalista quier saber "que ye lo que ganen los alcaldes metiendo priesa pa poner en funcionamientu una llinia ensin garantíes y que daña claramente a los vecinos".