“Antropolóxicamente les mazcaraes teníen la función de xunir al grupu de mozos y al pueblu, amás d'una intención de cortexu”, diz González

L’etnógrafu Óscar J. González protagonizó la charra última d’Ástura, que tenía’l títulu de ‘Cadarma de les mazcaraes europees: una nueva visión’. Nella destacó les “espectaculares” asemeyances ente estes celebraciones en toda Europa, que según el so argumentu, “teníen una función antropolóxica práutica y beneficiosa pal pueblu más allá de lo simbólicu, como yera el xunir al grupu de mozos y a la xente, amás d'una intención de cortexu”.

L’Atenéu Obreru de Xixón acoyó la conferencia del autor ‘Mascaradas de la Península Ibérica’, asoleyáu en febreru, pero con un llabor d’investigación llargu detrás. González principió nel añu 2005 “atopando toles mazcaraes qu’había”, pa depués, una vegada llocalizaes, principiar nel 2009 col trabayu con informantes pa conocer les carauterístiques de caúna. En total rexistró 321, de les qu’ocho son asturianes: el Guirria de Beleño, Los Sidros y La Comedia de Valdesoto, Os Reises de Valledor, Os Reises de Tormaleo, Guilandeiros de Tinéu, Os Aguilandeiros de Xedré, Os Aguilandeiros de Balbona de La Puela Ayande y los Aguilandeiros de San Xuan de Villapañada. A elles hai que sumar los Zamarranos de La Pola Ḷḷena, de la qu’hai información pero que yá nun se celebra.

Estes mazcaraes celébrense col cambiu d’añu y pa reis, a lo qu’hai que sumar los entroidos –principalmente en Galicia y Euskadi– y les vaquilles –na zona de Guadalajara y Madrid–, que se desendolquen pa San Sabestián (20 de xineru) y San Blas (2 de febrero). Toes elles tienen la función antropolóxica de “xuntar al grupu de mozos y al pueblu”, amás de ser un ritu d’iniciación y inclusive de cortexu enllenun de simbolismu. “El so orixe ye común en toda Europa”, apunta González, qu’atopa asemeyances espectaculares ente dalgunes d’elles, como ye’l casu de la Gomia de Llamas de Ribera (Lleón) y la Gamila na isla griega de Creta. “Dambes denominaciones paecen venir del araméu, de la pallabra ‘gamla’, col significáu de camellu”, esplica l’investigador.

Les más completes na Península, nel norte y noroeste

Toles mazcaraes tienen un funcionamientu similar, siendo les más completes les que se dan nel norte y noroeste de la de la Península Ibérica, nos Balcanes y na zona alpina; más al sur, éstes pierden les carauterístiques más pures, “quiciabes por cuestión de la relixón o tar averaes a centros de poder”. La ocupación árabe debió influyir y compruébase cómo les mazcaraes más importantes al sur tan en Granada-Murcia colos “inocentes” o nel Levante colos Santantones, toes elles influenciaes pel cristianismu. Los personaxes divídense nos guapos y nos feos, siendo la vieya’l –que fila o pare– ún de los más antiguos. El funcionamientu ye la reunión d’un grupu de mozos casi toos mazcaritaos que faen un percorríu pel pueblu, redolada y pueblos cercanos, pidiendo l’aguilandu, pa coles perres recaudaes facer una cena de confraternización.

N’Asturies, les mazcaraes d’occidente son les que caltienen esti modelu más clásicu. El Guirria, que ye ún únicu personaxe, y Los Sidros, con La Comedia, presenten carauterístiques propies, anque, por contra, “son les que presente un mayor futuru”. González defende “la recuperación de lo qu’había y, con eso, facer una fiesta nueva”, y destaca la importancia d’eventos como’l de Lisboa o Zamora empobinaos al turismu –hai otres asemeyaes en Bulgaria y nel norte d’Italia–, qu’axunten a mazcaraes de dellos puntos nuna folixa única. Too esto supón puxu abondo pal fechu investigador, turísticu, y la posible revitalización d’estes celebraciones.

Semeya obra de Juanjo Arrojo.