Mavea organiza una conferencia pa conocer la esperiencia de Txingudi, aplicable a la ría d’Avilés

|

El Grupu d’Ornitoloxía Mavea convidó a téunicos del parque ecolóxicu irundarra de Plaiaundi a contar la so esperiencia cola ensenada de Txingudi. Esti coleutivu ta trabayando na recuperación de la de Llodero, na ría d’Avilés.
 
La conferencia ta programada pa esti xueves, a les 19.30 hores, nel salón d’actos del Palaciu de Valdecarzana y lleva’l títulu de ‘Recuperación de marismas de Txingudi. Funcionamiento del Parque Ecológico de Plaiaundi (Marismas de Txingudi-Irún)’. Alberto Luengo, téunicu d’esti parque, va ser l’encargáu de contar a los presentes el proceso de recuperación de la ensenada de Txingudi, el so funcionamiento actual y los resultaos de l’actuación.
 
Dende Mavea, consideren qu’esta charra va ser “mui interesante pa comprender más a fondu el valor de la propuesta del nuesu grupu d’ornitoloxía para recuperar una parte de humedal de la nuesa ría, na ensenada de Llodero”. Amás, aseguren que “va servir d’exemplu del potencial socioeconómicu d’estos humedales, como puntu importante pa la educación ambiental, pa la investigación y pal turismu”. Esti coleutivu vien reclamando pa esta ensenada, que ta catalogada como monumentu natural en conxunto coles charques de Zeluán, un aumentu d’al menos 10 hectarees pa devolve-y parte del so estáu natural.

Contador Estadistiques