Masa (IX): "La posición del PP pa col asturianu ye retrógada"

"La nuesa propuesta yera l'usu billingüe pa la Comisión del Asturianu", asegura la diputada María Concepción Masa, sorprendida pola postura del PSOE y Foro nesti asuntu. "Cola oficialidá nun se plantegaríen estos problemes", añade la representante d'IX en dicha comisión, formación que ta buscando una vía llegal pa iguar la situación.

¿Cómo se desarrolló esta polémica pol usu del asturianu na Xunta Xeneral?

Izquierda Xunida constituyó la Comisión del Asturianu y na primera reunión de la Mesa pa concretar una llinia de trabayu y les feches de la mesma propunxi que les comunicaciones, de manera simbólica, foran billingües al ser una comisión concreta sobre l'asturianu. Cuando se llevó a la Xunta de Portavoces, el PP opúnxose a ello.

Nun primer momentu tolos grupos nun punxeron pegues, pero esti llunes, cuando se votó l'asuntu, namái Podemos defendió la so propuesta.

El PP amenazó con llevar el tema a los tribunales y el PSOE y Foro votaron lo mesmo que los populares. Ciudadanos tamién, anque nesti tema nun llegó a definese claramente.

¿Sorprendió-y?

Sorprendióme'l talante ambivalente d'estes formaciones. Tamos falando de non imponer, sinón d'emplegar l'asturianu, siempre de manera billingüe, nuna comisión sobre l'asturianu; namás pa esta comisión.

¿Y la postura del PP?

La posición del PP pa col asturianu ye retrógada. Critica tolo que se fai a favor del asturianu pese a qu'ellos aprobaron nel so día la Llei d'Usu.

¿Qué-y paeción'l polémicu tweet de Mercedes Fernández?

Reflexa mui claramente la so actitú.

¿Qué midíes va tomar IX?

Tamos estudiando la situación, porque'l tema llegal nun ta lo suficientemente claro. Aprovecharémos cualquier vía llegal pa iguar esta situación.

Güei celébrase la segunda reunión de la comisión. ¿Pa qué val ésta?

Trátase d'una comisión d'estudiu sobre la llingua asturiana. Nun primer momentu va analizase la situación actual de la llingua, revisando los estudios actuales al respeutu, pa depués entamar con un turno de comparecencies d'espertos. Por último, ellaboraráse un informe que debe analizar como ta l'asturianu y les pautes d'actuación que se deberíen de siguir.

¿Les sos conclusiones influyirán na redaición del definitivu Plan de Dignificación?

Sí, nesi sentíu se trabaya.

¿Qué plazos tien?

Debería tar finalizada en seis meses, enantes del branu.

¿Ye la oficialidá  la solución a situaciones como la vivida esti llunes?

Ta claro que cola oficialidá nun se plantegaríen estos problemes, pero agora mesmo ta mui difícil algamala. Siguirémos trabayando pa ello o pa l'ampliación de la Llei d'Usu.