Masa caltién que va siguir trabayando p'algamar consensu pal dictame de la comisión

El miércoles finó'l plazu pa presentar aportaciones al borrador del documentu final.

Concha Masa, diputada d'Izquierda Xunida y presidenta de la Comisión Especial d’Estudiu sobre'l Réxime de Proteición y Promoción del Asturianu, esplicó esta mañana que la so formación va siguir aldericando colos otros partíos una vegada conocíes les so posiciones y aportaciones cola intención de consiguir un dictame consensáu por toos o, polo menos, la mayoría de la Cámara. “El nuesu papel ye siguir negociando y nun nos vamos quedar atrás”, aseguró.

El so oxetivu ye llegar a una fórmulu de consensu ente aquellos que consideren precipitada la oficialidá, planteguen otros plazos o busquen entender meyor la situación social. “Yo creo que nun ye pa nada imposible llegar a alcuerdos y nesa llinia vamos trabayar”, añadió Masa, que pidió un tiempu pa estudiar les aportaciones y fixar la fecha del conceyu siguiente.

“En política hai que buscar una fórmula que consiga la mayoría. Pa eso tamos”, concluyó.