Más opiniones contra’l proyectu de térmica n’Avilés

L'agrupación del partíu nacionalista Andecha Astur n'Avilés emitió un duru comunicáu contra'l proyectu d'Isastur pa la instalación d'una térmica de 800 mw en Valliniello aprovechando les instalaciones de l'antigua térmica d'Ensidesa

Andecha Astur argumenta la so refuga a la instalación de la térmica en trés pegoyos, ente los que pon en primer llugar los riesgos pa la salú de los ciudadanos d'Avilés y la redolada del conceyu. Los nacionalistes soscriben les denuncies que nesti sentíu yá fexeren colectivos ecoloxistes del conceyu y que faen referencia a informes médicos d'oncólogos y pediatres nos qu'alvierten de los altos índices de bronquitis asmática, enfisema pulmonar y cáncanu que podría llevar la térmica a una zona que foi una de les más contaminaes d'Europa nos años 50 y 60. Amás de les emisiones de gases contaminantes Andecha Astur d'Avilés denuncia l'efectu de la hipotética central na ría, que sufriría una xuba de la temperatura del agua.

En segundu llugar, el partíu nacionalista denuncia l'ataque al patrimoniu arqueolóxicu industrial que supondría la destrucción dafechu de la térmica actual, un edificiu que ta enxertu nos catálogos d'interés de l'asociación de Documentación y Conservación del Movimientu Modernu (DOCOMOMO) como una de les ayalgues de l'arquitectura industrial n'Asturies. Andecha Astur d'Avilés fai un llamáu a que nun pase cola térmica d'Avilés lo mesmo qu'asocedió con otros edificios industriales del conceyu o mesmamente colos edificios del cascu vieyu de la ciudá, que desapaecen a razón "d'ún per selmana" al dicir d'Andecha Astur, que denuncia la falta de sensibilidá col patrimoniu del conceyu y pide una alternativa de conservación pa la térmica respetando les sos característiques.

Pa rematar, Andecha Astur d'Avilés denuncia'l retrasu que ta produciéndose nel procesu pa facer na térmica un centru cultural y el fechu de qu'esti proyectu quede agora venceyáu a los planes d'Isolux. Según Andecha astur "sorprende notablemente que l'equipu de gobiernu se plantegue un posible mecenazgu d'Isolux, cuando supuestamente esti mecenazgu ya lu comprometiere'l Gobiernu del Principáu". Andecha Astur entrúgase finalmente cuantes perres tan perdiéndose con cada pilancu que se pon nel proyectu de centru cultural pa la térmica cuando'l mesmu Ayuntamientu d'Avilés diere anuncia de que'l beneficiu d'esti centru diba andar alredor de los 9 millones d'euros al añu.