Más medios pa la Federación de Centros Asturianos

La Conseyería de Xusticia, Asuntos Europeos y Rellaciones Esteriores firmó ayeri un conveniu de collaboración cola Federación Internacional de Centros Asturianos (FICA) colos que va financiase una oficina, asitiada en Madrid, que valga como instrumentu de coordinación de la FICA colos distintos centros asturianos espardíos pel mundu. El conveniu tien un importe de 13.000 euros pa esti primer añu y va ser renovable n'años posteriores.

El conseyeru Francisco Javier García Valledor y el Director Xeneral d'Emigración Luis Miguel Fernández Romero asistieron a la firma d'esti conveniu xunta'l presidente de la FICA, José Luis Casas Villanueva, qu'esplicó qu'asina va contar con recursos propios ensin falta de competir poles subvenciones que reciben los centros asturianos y va meyorar enforma la comunicación de la FICA colos mesmos centros. Los medios nuevos van valir tamién pa facer más xuntes de la FICA colos centros, qu'actualmente namás aconceyen una vegada al añu nel Archivu d'Indianos de Colombres

El conseyeru García Valledor aprovechó la ocasión pa comprometese d'equí a lo que queda de llexislatura a visitar cada añu un centru asturianu distintu con motivu de la celebración del Día de la Patria del 8 de setiembre, anque nun dixo cual va ser el centru que visite primero.