Más de mil persones sofitaron a los sindicalistes Cándido y Morala nel xuiciu polos estrozos nes movilizaciones del naval

Celebróse esta mañana en Xixón el xuiciu contra los sindicalistes Cándido Carnero y Juan Manuel Martínez Morala, acusaos d'estrozos nel mobiliariu urbanu causaos nes movilizaciones del sector naval de la ciudá. Un númberu de cerca de mil persones, delles esperando yá a la puerta del xulgáu númberu ún de Xixón dende la nueche anterior, participaron nuna concentración de solidaridá colos acusaos, que s'enfrenten nesti xuiciu a una petición de cuatro años de cárcele.

Los dos dirixentes de la Corriente Sindical d'Izquierdes van tener que presentase'l próximu 12 de febreru a un segundu xuiciu en que van tener que responder por otres acusaciones d'estrozos causaos igualmente nes movilizaciones de Naval Xixón. Nesta segunda vista, el fiscal pide dos años y mediu de cárcele pa los sindicalistes pola quema d'una furgoneta na vía pública.

Los dos sindicalistes defenden la so inocencia y ven nel xuiciu una "campaña de persecución sindical". La plataforma de sofitu a este dos carismátiques figures del sindicalismu asturianu aseguren que tres del xuiciu a Cándido y Morala hai un intentu de "criminalizar a los trabayadores" y que "ye evidente que l'astilleru de Naval Xixón ye una "estorbisa pal Acuariu y pa los planes d'urbanizacion del Conceyu".