Más de mediu millón de persones yá recibieron la vacuna de la COVID-19

Tienen la pauta completa 290.603 asturianes y asturianos. El martes, n'otra xornada ensin muertes, la décima, rexistráronse 38 contaxos.

Ayeri superóse la barrera del mediu millón de persones vacunaes. En total recibieron el preparáu 501.652, lo que supón el 49,24 de la población del país y el 55,66 por cientu de la población diana, esto ye, los mayores de 16 años.

La inmunización total, mentes, tienla el 28,52 por cientu, el 32,24 por cientu de la población diana. En términos absolutos, son 290.603.

Hasta'l momentu refugaron vacunase un total de 10.916 persones, cantidá menor que la selmana pasada, yá que'l 25 de mayu yeren 11.664.

Tasa de positividá diaria del 1,96 por cientu

A falta de la espublización de los datos oficiales de la COVID-19, la Conseyería de Salú comunicó la detección de 38 casos nuevos ayeri –l'actualización aumenta la cantidá total en 3 más por casos non contabilizaos el día anterior–. Son 36 menos que'l llunes, cuando s'informó de 74.

Fixéronse 2.956 pruebes de diagnósticu d'infeición activa, polo que la tasa de positividá s'asitió nel 1,96 por cientu, inferior tamién a la de la xornada anterior, cuando foi del 3,35 por cientu con 3.098 tests realizaos. A 7 díes esti porcentaxe taba enantes de l'actualización nun 3,31 por cientu –ayeri baxó al 3,07 por cientu–.

Per décimu día nun hai finaos cola enfermedá causada pol coronavirus SARS-CoV-2, dalgo que nun se daba dende'l branu, en concreto nel periodu del 24 d'agostu al 2 de setiembre. El total de muertos nel andanciu sigue en 1.969.

Siguen 66 pacientes hospitalizaos con confirmación o sospecha de COVID-19 en planta, mentes que 33 tán na UCI, 1 más que'l llunes.

Na semeya, vacunación la selmana pasada a menores de 60 años nel autovac de La Pola Siero.