Más de mediu millar de persones visitaron San Antolín de Beón

Los percorríos guiaos de baldre pel templu llaniscu siguen tolos vienres d'esti mes.

La ilesia de San Antolín de Beón recibió, dende qu'abrió al públicu’l 20 de xunetu, un total de 511 visitantes, una cifra bien curiosa teniendo en cuenta que l'accesu públicu al edificiu namái ye posibles los vienres n’horariu de 10 a 14 hores. Nel mes d’agostu, el númberu mediu llegó al centenar, una afluencia que la Direición Xeneral de Patrimoniu Cultural considera relevante y que xustifica’l determín d’abrir al públicu’l templu de Beón.

La procedencia de les persones ye sobre manera asturiana, un total de 270, de les que 71 son residentes nel conceyu de Llanes. Amás, el monumentu percorriéronlu 228 visitantes españoles y 12 de fuera del Estáu.

L'accesu públicu al monumentu faise con un serviciu de guía, con cartelería informativa sobre la ilesia y les condiciones d’accesu nel esterior. Según afita la Llei de Patrimoniu Cultural, considérase la solución más afayadiza pa compatibilizar l’accesu al templu garantizando la so seguranza.

Semeya obra de Ramón baxo llicencia CC BY-SA 2.0.