Más de dos mil persones pidieron una presencia digna del asturianu na escuela

Más de dos mil persones salieron ayeri a la cai n'Uviéu en rempuesta a la convocatoria fecha poles organizaciones sindicales d'enseñanza CC.OO, FETE-UXT y SUATEA y la Xunta Pola Defensa de la Llingua asturiana, en reivindicación la retirada de la propuesta de decretu pal currículu d'educación primaria presentáu pola conseyería d'Educación y Ciencia. Los bastiaos que cayeron a lo llargo d'una maña desagradable enforma no meteorolóxico nun impidieron que la reivindicación d'una presencia digna del asturianu nel sistema educativu se sintiere nel centru de la capital. Ver Galería de semeyes.

La propuesta orixinal d'Educación supón según la Xunta y los Sindicatos convocantes, convertir na práctica l'asignatura de llingua asturiana nuna optativa, quitándo-y l'estatus de matreria voluntaria que tien actualmente. Esta cuestión tuvo nel noyu de la protesta y centro los lemes de les pancartes de les organizaciones qu'asistieron a la convocatoria. El manifiestu final, lleidu por Esther Fonseca na Plaza la Escandalera, sorrayaba precisamente que "l'accesu al estudiu y conocimientu de la nuesa llingua ye un derechu reconocíu espresamente pola llexislación qu'ha ser respetáu y garantizáu" y facía referencia a como l'asignatura nun ha competir con otres materies, como apaez nel documentu d'educación.

Les promeses del titular d'enseñanza, que se comprometió a rectificar el documentu orixinal, nun son abondo pa los sindicatos y la Xunta Pola Defensa de la Llingua Asturiana, que dulden de los términos en que vaya facese la rectificación y piden negociala directamente con Educación, una negociación que los sindicatos van diseñar nuna asamblea que va facese esti xueves 22 a les 18 hores nel Institutu Alfonso II d'Uviéu, xusto'l día enantes d'entrevistase col conseyeru con motivu del final del plazu d'alegaciones y suxerencies a la propuesta d'Educación. El testu final lleidu al final de la manifestación d'ayeri foi especialmente duru nesti sentíu, asegurando que les promeses de Riopedre son "mentira" y que "Más bien pensamos que foron cantos de serena pa evitar que nos movilizáremos". Los convocantes de la manifestación recordaron que "A día de güei nun se fexo rectificación nenguna nel borrador".

Nel manifiestu final de la protesta d'ayeri pidióse tamién un apueste p'abrir la posibilidá a que la llingua asturiana s'emplegue como llingua vehicular na enseñanza d'otres materies y pa que s'estabilice al profesoráu que la imparte. Asina, el testu lleídu na Plaza la Escandalera llamentaba que "A ventiún años de la entrada del asturianu na enseñanza tovía nun pue usase como llingua vehicular p'aprender otres materies por más que sea la llingua materna de munchos escolinos" denunciando l'agraviu coles propuestes de creación de centros billingües, de los que "fala cada poco la Conseyería d'Eduación" y nos que "sabemos que nenguna d'eses dos llingües ye l'asturiana".