Más de 200 empreses participen nel Puntu d'Alcuentru Internacional d'Asturex n'Uviéu

Pola anunció que la personalización de servicios y la incorporación de les teunoloxíes a la promoción empresarial van centrar nel 2018 les aiciones de la sociedá.

El conseyeru d'Emplegu, Industria y Turismu inauguró ayeri la decimoctava edición del Puntu d'Alcuentru Internacional de la Sociedá de Promoción Esterior Principáu d’Asturies (Asturex) na que participen más de 200 interesaes n'esportar los sos productos a dalgunos de los 52 estaos a los qu'esta iniciativa abre les sos puertes. Asina, hasta mañana, tán previstes nel uviedín Eurostars Hotel de La Reconquista más de 700 conceyos colos 28 consultores de la rede esterior d’Asturex nel que van poder recibir informaciones sobre les sos posiblidaes de negociu nestos mercaos.

Amás, les firmes que participen tienen accesu a puntos informativos d'instituciones rellacionaes cola internacionalización. Asina, nesti Puntu d’Alcuentru Internacional nuevu tán presentes cámares de comerciu, la Federación Asturiana de Empresarios (FADE), Liberbank, l’Instituto Español de Comercio Exterior (ICEX), los puertos d’Avilés y Xixón, y la Compañía Española de Seguros de Crédito a la Exportación (CESCE).

Nel actu qu'abría l'eventu, Isaac Pola anunció güei que les llinies principales d'actuación d'Asturex pal 2018 van centrase na personalización y orientación de los servicios hacia les necesidaes de les empreses en cualquier fase del procesu d’internacionalización. Tamién apuntó que la cooperación ente les compañíes asturianes constitúi otru de los oxetivos, xunto cola incorporación de teunoloxía y el tresformamientu dixital de les canales d'apertura hacia l'esterior.

Na semeya, Constantino Martínez, vicepresidente de FADE; Pola; y Teresa Vigón, direutora d'Asturex, na inauguración del XVIII Puntu d'Alcuentru Internacional.