La poeta Marta Mori presenta'l poemariu "El tiempu de la espera" col que ganó nel añu 2004 el premiu Teodoro Cuesta de poesía y qu'agora asoleya la casa Trabe. L'actu va ser el sábadu, 10 de xunu a les 19,00 hores, na Llibrería Asturiana d'Ediciones Trabe n'Uviéu.
Nesta obra l'autora confirma la so condición de poeta intimista, observadora y intérprete de los propios sentimientos, plantegando un itinerariu iniciáticu que conduz al llector dende'l dolor esistencial y la señardá de lo pasao hacia la serenidá y la confianza, depués de tocar distintes emociones y situaciones vitales como l'angustia y la tristura, l'erotismu, l'apegu y el desapegu hacia l'amante o la llegada del fíu. Nesti recorríu, les circunstancies biográfiques constitúin el puntu de partida d'una reflexón sobre delles preocupaciones universales, como la soledá, el pasu del tiempu o la construcción de la identidá como muyer.
Escritu con una voz austera ya inequívocamente femenina, el llibru cuenta la historia d'un aprendizaxe sentimental que tien como meta la conciencia y l'aceptación del dolor y de la muerte.
Marta Mori d'Arriba (Xixón,1965) ye doctora en Filoloxía Hispánica y profesora. Nel añu 2003, diose a conocer como poeta col llibru "Pórticu" tamién asoleyáu por Trabe. Tien asoleyaos dellos trabayos de crítica y historia lliteraria y didáutica de la llingua y la lliteratura, los más d'ellos sobre temes asturianos.