Marta Mori ganó'l Teodoro Cuesta

El premiu "Teodoro Cuesta" de poesía qu'entrega tolos años dende 1.991 la Casa de Cultura de Mieres ye ún de los más prestixosos galardones lliterarios que se dan nel país. Esti añu, el premiu que lleva'l nome del poeta de La Pasera foi pa Marta Mori d'Arriba, autora del poemariu "Villamar". Al paecer del xuráu, nel que taben Consuelo Vega, J.L Argüelles o Antón García ente otros, el poemariu de Marta Mori foi el meyor d'ente la docena de llibros que se presentaron. L'autora ye proesora d'institutu y collaboradora de l'Academia de la Llingua, encargándose del capítulu sobre la lliteratura del XVIII na "Historia de la lliteratura asturiana" que se presentó de recién.

Esta anuncia coincidió nel tiempu cola entrega efectiva del premiu al vencedor del 2.001, l'ayerán Ánxel Álvarez Llano col poemariu "na mesma piedra" acabante d'espublizar por Trabe.
El Conceyu de Mieres avisó de que, dende l'añu qu'entra, el xuráu dará'l ganador del certame coincidiendo col "Día del llibru" el 23 d'abril, entregándose'l premiu pa cuando la selmana de les Lletres Asturianes, que ye en mayu. Sedrá pa entós cuando se faiga la entrega del premiu del 2.002, dotáu con 3.600 euros.