Martínez Suárez, conseyeru de Presidencia, va llevar les árees d’Igualdá, Mocedá y Xusticia

Los ocho conseyeros del equipu de Gobiernu de Javier Fernández prometieron esti llunes los sos cargos. Guillermo Martínez Suárez, responsable de Presidencia, anunció que va encargase de les árees d’Igualdá, Mocedá y Xusticia.
 
El presidente del país emponderó’l "coraxe" y la disposición de "asumir responsabilidaes" de los ocho conseyeros –cinco muyeres y trés homes– y señaló que, ente toos, "sacarán alantre a Asturies". Fernández incidió en que tolos integrantes del Conseyu de Gobiernu "son conscientes del desafíu qu’afronten" y de las "dificultaes", y pese a ello, tarán "a la altor de les circunstancies". Los responsables de les conseyeríes son Guillermo Martínez (Presidencia), Ana González (Educación), Dolores Carcedo (Facienda), Graciano Torre (Economía y Emplegu), Esther Díaz (Bienestar Social y Vivienda), Faustino Blanco (Sanidá), Belén Fernández (Fomentu) y María Jesús Álvarez (Agroganadería).
 
Tres prometer los sos cargos, Martínez Suárez esplicó que’l so departamentu va coordinar nesta llexislatura les polítiques d’igualdá y mocedá, asina como l’área de Xusticia. Pela so parte, Torre anunció que va buscar el diálogu con tolos sectores y coleutivos, dando prioridá a la creación d’emplegu, y González apuntó que quier convertir al Centru Cultural Internacional Avilés “nun gran centru cultural que tien que poner a Avilés y a Asturies nel mundu”.
 
Na semeya, na primer fila, Torre, Martínez Suárez, Fernández, Carcedo y González; na segunda,  Belén Fernández, Díaz, Blanco y Álvarez.