Martínez Sierra recibe’l premiu del XVIII Concursu de Cuentos pola Oficialidá

El Conceyu de Bimenes celebra esti vienres l'actu d’entrega de gallardones énte la capiella de San Xuan, en Tabayes.

El cuentu ‘Ensin fades, ensin perdices’ d’Ana Esther Martínez Sierra resultó escoyíu como’l meyor de tolos presentaos pal  XVIII Concursu de Cuentos pola Oficialidá del Asturianu pol xuráu formáu polos escritores Xulio Vixil Castañón, Isabel Gutiérrez Novo y Pablo Rodríguez Alonso, amás de pol alcalde de Bimenes nesi momentu, Alejandro Canteli Rozada, y el téunicu responsable de la Estaya de Cultura, Daniel Cueli, que fixeron les funciones de presidente y secretariu, de manera respeutiva. La escritora naveta va recibir una recompensa de 600 euros y va facer una llectura pública de la so historia.

El segundu puestu d’esta edición d’esti concursu, dotáu en 450 euros, foi pa Laura Marcos por ‘Stylommantophora’, mentes que’l terceru (300 euros) llevólu Héctor Pérez Iglesias por ‘Si verde’. Los trés premiaos van recibir el so gallardón mientres un act previstu pa les 20 hores énte la capiella de San Xuan nel que ta prevista la presencia de Salvador Gutiérrez Ordóñez, miembru de la RAE natural de Bimenes.

Mentes, l’humorista maliayés Marcos SL va encargase de poner el ramu de la entrega de premios col monólogu ‘Xente mozo’.

Una Fiesta de la Oficialidá reivindicativa

Esti eventu celébrase una selmana depués de la XIX Fiesta de la Oficialidá de la Llingua Asturiana, qu’esti añu apregonó Joaquín García Gutiérrez ‘Xuacu’, l’alcalde que puxó pola declaración d’oficialidá del asturianu nel conceyu yerbatu, y que tuvo marcada pola reivindicación.