Martínez-Radío va falar n’Almansa sobre los prisioneros de la batalla qu’aportaron a Asturies

L’historiador asturianu Evaristo Martínez-Radío va protagonizar una charra esti vienres n’Almansa. Ésta lleva’l títulu de ‘Prisioneros de la batalla de Almansa: su resonancia en Asturias’ y ta entamada por 1707 Almansa Histórica.
 
La batalla d’Almansa, que recibe esti nome por desarrollase nesti pueblu albaceteñu, tuvo llugar nel añu 1707 dientro de la Guerra de Sucesión Española qu’enfrentó a los partidarios de los ‘borbones’ y de los ‘austrias’. El trunfu de les tropes borbóniques nun foi definitivu, anque sí un pasu alantre pa la ocupación del Reinu de Valencia na llucha por mantener al duque d’Anjou, coronáu como Felipe V, nel tronu. Como resultáu d’esta batalla na que “taba en xuegu l'orde políticu del mundu occidental del momentu”, según esplica Martínez-Radío, profesor de la UNED de Xixón, munchos homes foron fechos prisioneros y dalgunos tuvieron cativos n’Asturies.
 
“Con esta esposición pretendemos averanos a qué asocedió colos vencíos d’Almansa, aquellos prisioneros que fueron esvalixaos por otros territorios ayenos a la so patria. Ye'l casu que detectamos n'Asturies, onde llegaron cativos ingleses, flamencos, holandeses y portugueses, de xuru por ser un llugar consideráu fora de peligru. Tales cativos, bastantes mancaos, nun foron curiaos en fortaleces o castiellos, sinón polos mesmos vecinos d'aquellos conceyos como una carga impositiva más a una tierra probe”, señala Martínez-Radío, que va centrase na charra de güei na Casa de Cultura d’Almansa nes histories del día a día d’estos homes, “histories humanes, alloñaes de la sangre”.
 
“Ye indubitable que más allá de disputes territoriales y polítiques, hemos d'afitanos nunos estranxeros que tuvieron que coesistir o, por qué non en munches ocasiones, convivir col que tenía de ser el so enemigu, dándonos una imaxe realmente más cercana en cuantes que les primeres motivaciones del ser humanu pueden tar bien alloñaes de les de los sos líderes”, esplica l’historiador. Esta charra que va dar güei Martínez-Radío n’Almansa ta entamada pola Asociación Cultural 1707 Almansa Histórica, en collaboración col Ayuntamientu d’Almansa, y completa a otra del profesor Miguel Jover Cerdá sobre la ‘Evolución de las técnicas bélicas: de la Edad Media a la Edad Moderna’ que diba celebrase’l vienres pasáu y que foi aplazada al 21 d’ochobre.