Martínez Llosa: “El Conceyu de Siero va tar onde tean Los Sidros; son los nuesos embaxadores”

Eduardo Martínez Llosa, alcalde de Siero, tuvo presente nel FIMI de Lisboa en compañía de Mauricio Bogomak, conceyal de Rellaciones Institucionales. El primer edil disfrutó en Portugal cola participación de Los Sidros y La Comedia.

¿Yera ésta la primer vegada que tuvo nel Festival Internacional Máscara Ibérica (FIMI)?

Sí. Yá tuviera nel de Zamora y tenía ganes de venir al de Lisboa polo bien y muncho que me falaren d’él. El de Zamora ta mui bien, pero ésti ye nuna capita europea y tien muncha más repercusión. Foi una bona esperiencia.

¿Qué valoración fai del certame qu'entama Progestur?

Trátase d’un festival turístico-cultural-gastronómicu con muncha repercusión, non sólo n’Iberia, sinón a nivel européu. Ye un puntu d’alcuentru que trae consecuencies mui positives y que sirve pa tresmitir la imaxe de Siero. Mientres el certame tuvimos reuniones empresariales y culturales mui provechoses que pueden desendolcar n’otros actos y actividaes.

¿Avanzó dalgún tipu de collaboración?  

Tuvimos munchos contautos y concretamos la presencia del presidente de la Fundación Luso-Española pa una reunión empresaria nel conceyu. Tamién falamos col embaxador de Bulgaria, país que contó cola presencia d’un grupu que tien muncha repercusión ellí y que protagoniza’l que quiciabes ye’l carnaval más antiguu de la historia, y colos representantes de la Diputación de Zamora. Nesi sen, tamos entamando la creación d’un exe Lisboa-Zamora-Siero pa ser referentes nel tema de les mazcaraes.

Los Sidros y La Comedia tornaron a ser embaxadores de Siero.

Los Sidros y La Comedia son una referencia agora mesmo, non sólo en Valdesoto. Representen al conceyu allá onde van y, en Lisboa, dan vida al desfile, onde son fundamentales. Dinamicen cualquier cosa que toquen. La verdá ye que velos emociona.

¿Cómo foi la participación del Conceyu de Siero nel FIMI?

Llevamos a dos téunicos de l’Axencia de Desarrollu llocal y repartimos folletos turísticos nun stand. Nellos promocionábamos rutes turístiques pel conceyu y l’agroalimentación de la zona.

¿Va potenciar la presencia del so conceyu nel certame pal añu qu’entra, al que yá tán convidaos pa tornar Los Sidros y La Comedia?

Ye pronto pa responder, porque tamos falando a un añu vista. Lo que tengo nidio ye que’l Conceyu de Siero va tar presente onde tean Los Sidros, los nuesos embaxadores. Son la nuesa meyor promoción y debemos de tar xuntos pa sumar.

¿Cree qu’Asturies tien que tener una presencia mayor nel FIMI?

Yo namái puedo falar por Siero. Nesta ocasión tuvimos representaos por dellos conceyos, como Xixón y Cangues d’Onís, pero ta nidio que’l FIMI proyeuta la imaxe d’Asturies y que ye un escaparate que tien muncha reperecusión. Hai qu’aprovechar que Lisboa ye un de los pocos enllaces d’avión que tenemos y que’l viaxe ye cómodu, de poco más d’una hora, p’atrayer visitantes portugueses.

La selmanda pasada roblóse un convenio de collaboración de Siero col xixonés Festival Arcu Atlánticu. ¿En qué va consistir?

Trátase d’un alcuerdu de la conceyalía de Cultura y el equipu de gobiernu municipal con Xixón pa participar nel festival xixonés. Con él pretendemos atrayer polos de xente qu’acuda a Xixón, pa lo que vamos a tener un stand propiu y un día dedicáu al nuesu conceyu dientro de la programación del festival.

Na semeya, Martínez Llosa y Bogomak posen con un sidru delantre del stand de Siero na Mostra das Regiões del FIMI.