Maroto condiciona n’Uviéu l’aprobación del Estatutu de los Consumidores Lletrointensivos a la formación del Gobiernu

|
Rayes Maroto y Aitor García Corte

La ministra d’Industria, Comerciu y Turismu en funciones, Reyes Maroto, ta de visita n’Asturies, onde condicionó l’aprobación del Estatutu de los Consumidores Lletrointensivos a la formación del Gobiernu estatal. Aconceyó n’Uviéu con Adrián Barbón y los conseyeros nuevos, pa depués visitar col presidente la FIDMA.

El llavianés convidara a Maroto a Asturies p’aconceyar con ella pa tratar dellos asuntos y presenta-y a los miembros del Executivu. La primera parada foi n’Uviéu, nel Palaciu de Presidencia, onde confirmó que l’Estatutu de los Consumidores Lletrointensivos, col borrador yá llistu, depende de la conformación del  Gobiernu estatal, yá qu’ún en funciones nun pue aprobalo.

Esta norma, que permitirá garantizar el caltenimientu de la competitivá llétrica de les industries del Estáu con respueto a les de fuera, va carauterizar y recoyer los sos derechos y obligaciones en rellación cola so participación nel sistema y los mercaos d'elletricidá. Asturies cuenta con delles importante firmes que son grandes consumidores, como ye'l casu de la vieya Alcoa, agora Alu Iberia AVL depués de la compra por parte de Parter Capital, grupu suizu que condiciona’l futuru de la planta avilesina más allá del 2021 al costu de la enerxía nesi momentu.

Aranceles medioambientales de la XE

Tres el so alcuentru con Barbón, la ministra coincidió col presidente na importancia del afitamientu d’aranceles medioambientales na Xunión Europea pa protexer a la industria europea. Les plantes d’ArcelorMittal n’Asturies son de les más afeutaes pola competencia con empreses siderúrxiques de fuera del territoriu comunitariu y dende’l Gobiernu estatal yá unviaron una carta a la Comisión Europea pa soliciar la incorporación d’esti asuntu a l’axenda.

Maroto tamién anunció n’Uviéu l’entamu de 73 proyeutos nes zones mineres con una inversión total de 100 millones d’euros, y l’axudicación a Asturies de 33,6 millones d’euros del Plan Reindus pa 12 proyeutos. Tres l’alcuentru n’Uviéu, la ministra y Barbón desplazáronse a Xixón pa visitar la Feria Internacional de Muestres d’Asturies (FIDMA) xunto con dellos conseyeros, ente ellos Berta Piñán, responsable de Cultura, Política Llingüística y Turismu.

Una de les paraes del so percorríu foi’l Muséu del Pueblu d’Asturies, onde tuvo la oportunidá de falar con Aitor García Corte, alcalde de Bimenes, conceyu qu’esti añu instaló un puestu nesti llugar tan emblemáticu. Tamién visitó’l Pabellón d’Asturies y de delles empreses, como Hunosa o Edp, ente otres, y firmó'l Llibru d'Honor de la FIDMA.

Por último, la ministra viaxó hasta Avilés, pa vese cola alcaldesa Marivía Monteserín y aconceyar col comité d’empresa de la vieya Alcoa.

Na semeya, Maroto fala con García Corte énte la mirada atenta de Félix Baragaño, presidente de la Cámara de Comercio de Gijón.

Contador Estadistiques