Marisa Valle Roso va ufrir cinco conciertos más dientro de la xira de presentación de ‘De lo fondero l’alma’

La llangreana Marisa Valle Roso continúa cola xira de presentación del so primer discu en solitariu, ‘De lo fondero l’alma’. En payares y avientu va ufrir cinco conciertos nuevos en delles poblaciones asturianes.

La primer parada de la xira va ser en Tinéu’l vienres 16, nel Cine Marvi, pa llueu continuar en Grau nel IES Ramón Areces (día 25) y en Xixón nel Centru Municipal Integráu Pumarín-Xixón Sur (día 30). Les dos cites que completen esti tramu de la xira son La Felguera (7 d’avientu, Teatru Nuevu) y Morea (13 d’avientu, Teatru Cine Carmen). Toles actuaciones van principiar a les 20.30 hores y tienen un preciu de 6 euros.

Pablo Carrera (gaita), Xaime Arias (pianu) y Rodrigo Sturm (guitarra) acompañen a Marisa nestos cinco conciertos colos que la cantante de tonada continúa faciendo promoción del so trabayu en solitariu. ‘De lo fondero l’alma’ trátase d’un discu nel que Marisa recueye los cantares más representativos del repertoriu qu’utilizó nes sos actuaciones de los últimos años, destacando l’amplia variedá d’estilos dientro la canción asturiana: canción al altu la lleva, arrieres, ayeranes, d’autor o vaqueira, ente otres.