Marisa Valle Roso va presentar en La Felguera 'De lo fondero l'alma', el so primer discu en solitariu

Esti vienres, a les 20 hores, el Teatru Nuevu de La Felguera va acoyer la presentación del primer discu en solitariu de Marisa Valle Roso. ‘De lo fondero l’alma’ ye’l títulu d’esti trabayu d’una de les grandes promeses de la canción asturiana.
 
Esti discu, editáu por EveryGoodSong, recueye los cantares más representativos del repertoriu qu’utilizó nes sos actuaciones la llangreana nos años últimos, tocando dellos estilos dientro de la canción asturiana. Asina, en ‘De lo fondero l’alma’ atópase canción al altu la lleva, arrieres, ayeranes, d’autor o vaqueira, ente otres.
 
Nesti trabayu, Marisa disfrutó de la collaboración de Pablo Carrera (gaita), Xaime Arias (pianu), Rodrigo Sturm (guitarra) y Estefanía Moro (percusiones tradicionales), que van participar nel conciertu de mañana. El so hermanu Fernando, col que tien espublizáu un discu col nome ‘Un pasu más’ (2009), va encargase de la presentación d’esta actuación con entrada llibre.