Marisa Valle Roso lleva la tonada al festival de flamencu Cante de las Minas

|
Cartelu Marisa Valle Roso nel Festival Internacional del Cante de las Minas

Dende'l 3 d'agostu ta celebrándose en La Unión el Festival Internacional del Cante de las Minas, consideráu como'l más importante dedicáu al flamencu del mundu. Nesta edición del certame la tonada va tener un güecu na programación gracies a Marisa Valle Roso y al guitarrista Emilio Ribera.

Baxo'l nome de 'Acercamientu ente la Cuenca Minera de Llangréu (Asturies) y La Unión', la cantante va ufrir mañana un "conciertu de música minera asturiana" a les 19.30 hores na cai Mayor/Plaza Joaquín Costa d'esta población murciana. Pa ello va tar acompañada de guitarrista Emilio Ribera, de Pablo Carrera (gaita, flauta y percusión) y de Sergio Pevida (percusión).

Valle Roso consegue asina llevar fuera de les nueses llendes la canción asturiana nel so emocionante espectáculu 'Suena la mina', na que la llangreana estremez al públicu con cantares que marcaron la historia de la minería a nivel mundial. Asina, Marisa versiona temes de Violeta Parra, Víctor Jara o de los asturianos Nuberu con un acompañamiento musical totalmente innovador.

Contador Estadistiques