Mariluz Cristóbal echa un "Cantar de Seronda"

Una de les cantantes de tonada con más nome na música asturiana, Mariluz Cristóbal Caunedo, presentó'l so segundu discu cola casa de discos Fonoastur. La presentación a la prensa fízose nos locales de la SGAE d'Uviéu, y ellí la cantante xunta'l responsable de Fonoastur Lisardo Lombardía esmigayaron les característiques d'esti discu que se presenta col nome de "Cantar de Seronda".

Esti ye'l segundu discu de Mariluz Cristóbal Caunedo con Fonoastur depués d'aquel "Onde la ñublina posa" del añu 2002. Tamién ye'l segundu discu nel que la cantante apuesta por xuntar la so voz con un cientu d'instrumentos y igües diferentes que multiplica esponencialmente les posibilidaes de la música de Caunedo. Asina, 24 músicos collaboren nos 18 cantares tradicionales que formen el discu, que significa una xuntanza ente una xeneración más veterana representada por Mariluz, con otra más moza onde tán los músicos y arreglistes del cd. Ente la riestra de collaboradores topamos a nomes como la Bandina'l Tombo al completu, el grupu DRD tamién dafechu, el cantante Horacio Huerta pa una tonada dialogada, el clarinete d'Indalecio Santos, voces del grupu Muyeres o la gaita del gaiteru mozu xixonés Llorián García qu'acompañó a la cantante nos temes tradicionales de voz y gaita.

Amás de ser un discu que sorprende pola instrumentación qu'acompaña a la voz, onde más rescampla ye nes igües que s'usaron pa facer esa compaña. Dende la esencia más tradicional cola gaita, hasta los arreglos más sorprendentes pasando pel jazz, folk acústicu, pianu, bandina de romería...etc, que da al discu una variedá tímbrica y estilística que s'agradez muncho. Con too y con ello, la tonada ye que la que manda y los instrumentos nun pasen penriba de la de la voz de Mariluz que se caltién como la protagonista del discu.

La cantante amosó a lo llargo de la presentación la so gran satisfacción pol resultáu del discu ya que "depués de grabar "onde la ñublina posa" yera muncha responsabilidá sacar esti segundu, pero'l resultáu final déxame mui contenta". Caunedo quixo agradecer la so collaboración a los músicos que collaboraron con ella, que representen "una xente mozo que trabayen per caminos nuevos bebiendo de les fontes de lo tradicional". Mariluz agradeció especialmente el trabayu de Lisardo Lombardía "si nel que nun sacaría nin esti nin l'anterior discu". Pal futuru la cantante aseguró que-y prestaría trabayar sobre melodíes y lletres nueves pa que la composición entre nel mundu la tonada, "pero trabayando siempre respetando y ensin escaecer la tradición".