Mariluz Cristóbal Caunedo gana’l XI Distintivu Fini Suárez

La cantante de tonada Mariluz Cristóbal Caunedo va recibir el 8 d’abril el XI Distintivu Fini Suárez pol so respetu al estilu tradicional nel so trabayu. La entrega d’esti premiu va coincidir col pregón de la Folixa na Primavera de Mieres.
 
Rafael Perdiguer, conceyal de Festexos, y una representación del xuráu, dieron a conocer güei a la ganadoradel Distintivu, un galardón que recuerda la memoria de la folclorista mierense Fini Suárez y que tien como oxetivu premiar a aquelles persones que trabayen pol folclor asturianu. L’añu pasáu llevólu l’artesanu gaiteru Alberto Fernández y nesta ocasión Cristóbal ye la persona escoyida pol xuráu pa recibir esti reconocimientu.
 
“María Luz Cristóbal Caunedo, de Máñules (Tinéu), ye cantante de tonada, autodidacta, con una llarga trayectoria nel mundu de la canción asturiana”, señalaron los responsables del premiu, que destacaron que l’argumentu principal pa la so eleición, fecha por unanimidá pol xuráu, ye "la calidá grande del so trabayu, con un respetu absolutu al estilu tradicional que supo xunir coles renovaciones que nos 25 años últimos se dan nel panorama musical asturianu xeneral”. Amás, consideren a Cristóbal como “una de les protagonistas del averamientu ente la xeneración más veterana, representada por ella, y otra más moza”.
 
La entrega del Distintivu ye una de les actividaes de la Folixa na Primavera que va llevar a Mieres, los díes 8, 9 y 10 d’abril, una representación de la música fecha nel Arcu Atlánticu.