Mari Luz Cristóbal y Anabel Santiago abren en Xixón un ciclu dedicáu a la música tradicional reinterpretada

Un conciertu de Mari Luz Cristóbal y Anabel Santiago ye’l primer eventu del ciclu entamáu pol Conceyu de Xixón baxo’l nome de ‘Encuentros de Músicas Asturianas’. Doce actuaciones ente ochobre y payares conformen esta iniciativa.

‘De xuru’ ye’l nome del espectáculu músicu-teatral conxuntu de Cristóbal y Santiago que combina la pallabra recitada de Carla Menéndez y la tonada de les dos cantantes referencia del xéneru, que faen el papel de madre y fía. El salón d’actos del Centru Municipal Integráu Atenéu La Calzada acueye güei, con entrada llibre, esti recital con testos creaos pa la ocasión por Xosé Lluis Remis, que va principiar a les 19.30 hores.

Otres 11 actuaciones conformen ‘Encuentros de Músicas Asturianas’, ciclu municipal entamáu pol proyeutu musical Distrito Música qu’amuesa un retrocesu nuevu en materia llingüística por parte del Conceyu de Xixón al escaecer l’usu del asturianu, dalgo más grave entá si la temática del mesmu ye la música tradicional del país. Toos estos conciertos son d'artistes qu'amiesten la música tradicional con otros estilos y van tener como sede dellos centros municipales de la ciudá: N’Ochebre (día 29, Pumarín-Xixón Sur), Rodrigo Cuevas (30, El Llano), N’Ochebre (5 de payares, L’Arena), Rodrigo Cuevas (6, El Coto), Anabel Santiago Tríu (7, El Llano), Tríu Sacava (8, Pumarín-Xixón Sur), Azabache y Proyecto Piloto (9, Atenéu La Calzada), Mari Luz Cristóbal y Anabael Santiago (12, L’Arena), Tríu Sacava (13, El Coto), Azabache y Proyecto Piloto (14, El Llano) y Anabel Santago Tríu (15, Atenéu La Calzada).