Marcos Vallaure destaca la collaboración de los conceyos na XXXIII Selmana de les Lletres

El conseyeru de Cultura en funciones, Emilio Marcos Vallaure, destacó la collaboración de los conceyos y la comunidá escolar na XXXIII Selmana de les Lletres Asturianes. Esti añu ta dedicada a los poetes Benito de l’Auxa y Antón Balvidares.
 
Esta edición de la Selmana de les Lletres va principiar el llunes y va terminar el vienres 4 de mayu cola celebración del Día de les Lletres Asturianes. A lo llargo d’estos cinco díes van celebrase pol tol país dellos actos institucionales, presentaciones de llibros, conferencies, recitales y actos escolares. Marcos Vallaure presentó güei n’Uviéu la totalidá del programa d’actividaes que principien en Xixón y que van continuar polos conceyos de Grau, Uviéu, Carreño, Sariegu y Santalla d’Ozcos. Na so intervención, destacó la collaboración de los conceyos y de la comunidá escolar pa poner en valor la llingua asturiana.
 
Na mesma llinia, l’alcalde de Carreño, Ángel Riego, agradeció l’homenaxe al poeta candasín Benito de l'Auxa y reivindicó la so figura nel ámbitu de la Ilustración. Al respeuto, anunció que’l Conceyu va dedica-y una sala na Biblioteca Carlos González Posada. Pela so parte, el teniente d’alcalde de Sariegu, José Luis Chillón, tuvo pallabres de reconocimientu pal tamién poeta ilustráu Antón Balvidares y afirmó que se trata d’una oportunidá bona pa conocer la trayeutoria d’esti escritor y el so conceyu natal. Amás, el primer edil de Santalla d’Ozcos, Antonio Riveras, valoró que s’apueste pola entrada de la fala nesta celebración.
 
El direutor xeneral de Política Llingüística, Alfredo Ignacio Álvarez Menéndez, reseñó la pretensión de continuar, con esta edición de la Selmana de les Lletres Asturiens, colos actos conmemorativos de la Ilustración, como’l bicentenariu de Xovellanos, asina como de potenciar a escritores que nun foran tan reconocíos y, al mesmo tiempu, dignificar la coexistencia de les diversidaes llingüístiques d’Asturies. "Esta xeneración d’ilustraos representa valores colos que s’identifica la política llingüística d’esta conseyería", apuntó Álvarez Menéndez, que destacó qu’estes persones entendíen "mui bien" la llingua como elementu esencial pa comprender el caráuter de los asturianos y creíen nel so usu cultu.