Marcos Rodríguez lleva a La Llegra la so ponencia sobre la vindicación de la escolarización nel idioma

|
Cartelu charra 'Bable nes escueles' La Llegra

Oportunidá nueva pa sentir esta conferencia que formó parte del programa de les XXXVI Xornaes Internacionales d'Estudiu.

'Bable nes escueles: Averamientu hestórico-políticu a la vindicación de la escolarización de la llingua asturiana' foi una de les intervenciones más destacaes de l'actividá qu'entama l'Academia de la Llingua Asturiana y que se celebró a primeros de mes. Nella, l'investigador de la Universidá d'Uviéu Marcos Rodríguez López fai un percorríu pelos primeros años de normalización social del asturianu, dende'l 1974 al 1984, añu nel que l'asignatura de Llingua Asturiana aporta a la escuela manera oficial y reglada.

"Asina, 33 años dempués, podemos observar una panorámica que nos permita entender cuála yera la situación na que s'atopaba la llingua asturiana daquella pa siguir analizando cuáles son les necesidaes del idioma anguaño lo mesmo na escuela que nel restu de la sociedá", apunten dende l'uviedín Llar La Llegra, qu'acueye la charra mañana, a les 19.30 hores. "Nun momentu políticu nel que la oficialidá del asturianu y del gallego-asturiano puede ser algamada a la fin tres décades de llucha nes cais esti alderique histórico-políticu garra, si cabe, más interés", añaden.

Contador Estadistiques