“Marcelo yá sabía de qué diba lo de la sidra”, rellata García Corte

|
Marcelo Rebelo de Sousa y Aitor García Corte na Casa de la Lhéngua Mirandesa

L’alcalde de Bimenes, Aitor García Corte, acudió un añu más al Dia da Cidade de Miranda de l Douro, que conmemora l’aniversariu de la so elevación a ciudá el 10 de xunetu del 1545. Nesta ocasión participó’l presidente de la República Portuguesa, Marcelo Rebelo de Sousa, col que’l yerbatu aldericó frente a la Casa de la Lhéngua Mirandesa.

Artur Nunes, alcalde de Mirada de l Douro, encargóse d’introducir a García Corte nel alcuentru d'esti sábadu col xefe d’Estáu portugués. “Esplicó-y el nuesu hermanamientu y la situación de la nuesa llingua, que ye oficial en Portugal pero que nun lo ye n’Asturies”, rellata’l primer edil, que caltuvo un alderique breve con Marcelo, “una persona mui querida en Portugal”, como pudo comprobar.

Tuvo la oportunidá tamién d’entrega-y un lote de productos de Bimenes, nel que destacaben los chorizos del conceyu y la sidra. “Yá sabía de qué diba”, apunta’l yerbatu en referencia al conocimientu del portugués sobre la nuesa bébora y les so particularidaes.

“Los llazos van caltenese”

García Corte aprovechó d’igual forma’l viaxe pa falar con dellos candidatos a les eleiciones municipales, que van tener llugar depués del branu. Nunes nun va presentase por cumplir el máximu de mandatos, “pero los llazos ente Miranda y Bimenes van caltenese”, asegura’l cabezaleru d’Asturianistes por Bimenes, que rescampla “la visibilidá” qu’algama’l conceyu yerbatu nestes cites.

Esta bona rellación vien del hermanamientu celebráu hai 21 años llueu de la oficialización del l’asturianu en Bimenes, nel 1997, y nesti llugar portugués, nel 1999. Dende entós, les visites y los intercambios culturales foron constantes, con presencia de Nunes na Fiesta de la Oficialidá y de García Corte nel Dia da Cidade estos años últimos.

Esta celebración mirandesa conmemora la elevación a ciudá del llugar nel 1545, fecha de la que se cumplíen 476 años, y que cuenta con numberoses actividaes y conciertos. Dada la situación pola pandemia, esti añu redúxose a la tradicional Assembleia Municipal Extraordinaria y a unos pocos eventos, ente ellos el discursu del presidente portugués, que dixo unes pallabres en mirandés.

Na imaxe, Rebelo de Sousa y García Corte frente a la Casa de la Lhéngua Mirandesa. Semeya obra de Luis Falcón.

Contador Estadistiques