María Esther García presentó en Ḷḷuarca ‘Alredor de la Quintana: animales y otros bichos’

La escritora valdesana María Esther García López presentó na Casa Cultura de Ḷḷuarca’l llibru ‘Alredor de la Quintana: animales y otros bichos’. Ésti recueye 17 artículos nel que fai memoria de 21 especies venceyaes a les aldees asturianes.

Na obra rememora la so infancia en La Degoḷḷada y apurre una visión de los animales “dende'l  puntu de vista etnográficu y sentimental, onde se cuenten anéudotes, querencies y creencies, sanamientos, rezares, vivencies y acordances alredor  d’estos ‘collacios’ que tán presentes y formen parte de la vida de la casería n'Asturies”, destaquen dende Ediciones Trabe. Tolos artículos presentes en ‘Alredor de la Quintana: animales y otros bichos’ espublizáronse na seición ‘La Nueva Quintana’ del diariu ‘La Nueva España’ nos años 2009 y 2010.

La presentación del llibru tuvo llugar el vienres en Ḷḷuarca nun actu celebráu énte mediu centenar de persones nel que participaron, xunto a García López, l’alcalde Simón Guardado; el conceyal de Cultura, Gumersindo Cuervo; y Luis Laria, direutor de la Coordinadora para el Estudio y Protección de las Especies Marines (CEPESMA). Con esti trabayu, l’autora valdesana, llicenciada en Pedagoxía, maestra, esperta en Filoloxía Asturiana y  miembru correspondiente de l’Academia de la Llingua Asturiana, suma’l llibru númberu 34 de la so trayeutoria lliteraria.

Na semeya, Laria, Guardado, García López y Cuervo.