Manta Ray yá tien la so Estratexa

El grupu asturianu "Manta Ray" acabó va poco la grabación del so discu "Estratexa", depués de tres años ensin sacar discu a la cai.

Va pa tres años dende que "Manta Ray" sacara discu en solitariu. El grupu formáu por José Luis García, Nacho Álvarez, Frank Rudow y Xabel Vegas, trabayaron con cuidáu la grabación d'esti cd, que saldrá cola discográfica pola que ficharon nun va muncho, "Acuarela". El discu tien la producción de Kaki Arkarazo, que tamién fizo la producción de "Sube la Marea", caberu discu de "Dixebra".

"Estratexa" son diez canciones, qu'anque grabaes n'estudiu, dan muncha importancia a la sinceridá del so soníu, ye dicir, averar esi soníu d'estudiu al direuto. Ello ye que'l discu grabóse buscando esi resultáu, pero pa ello nun fai falta escaecer tolos elementos que siempre definieron a "Manta Ray". La fecha pa espublizar el discu ye'l tres de febreru del añu qu'entra.

Amás "Manta ray" y "Mus" tamién participen nun triple cd editáu por Acuarela. Esta cd llamáu "Acuarela Songs", ye un campu d'esperimentación que se-y da a los grupos pa faigan coses fuera de compromisos comerciales o discográficos, nel triple cd tamién participen xente como Dominique A, Sr. Chinarro, Experience, Lee Ranaldo (Sonic Youth), Thalia Zedek, L´Altra, The Zephyrs, Don Nino, Migala, Vitesse, Refree, Jack, Victory at Sea, y un llargu etc…